കോട്ടയം: റോഡ് വികസിച്ചു, വാഹനങ്ങളുടെ വേഗവും കൂടി, ഒപ്പം എം.സി റോഡിൽ അപകടപരമ്പരയ്ക്ക് അറുതിയില്ല.
പകലും രാത്രിയും അപകടങ്ങൾ പതിവാകുമ്പോൾ ഇന്നലെ കുറവിലങ്ങാട് കാറും കണ്ടെയ്നർ ലോറിയും കൂട്ടിയിടിച്ചുണ്ടായ അപകടത്തിൽ ഒരു ജീവൻ കൂടി പൊലിഞ്ഞു.
അമിതവേഗവും അശ്രദ്ധമായ ഡ്രൈവിംഗും അപകടസാദ്ധ്യതയുള്ള വളവുകളും അപകടങ്ങൾക്ക് വഴിമരുന്നിടുകയാണ്.
റോഡ് വികസനത്തോടൊപ്പം സുരക്ഷയും ഉറപ്പാക്കിയില്ലെങ്കിൽ നിരത്തിൽ ഇനിയും ചോരപ്പാടുകൾ വീഴുമെന്ന് ഉറപ്പാണ്.
ഉന്നത നിലവാരത്തിൽ ടാർ ചെയ്ത് റോഡുകളിൽ വാഹനങ്ങൾക്ക് മരണവേഗമാണ്. ഇത് അപകടങ്ങൾക്ക് ആക്കംകൂട്ടി.
രാത്രിയിൽ മാത്രമല്ല, പകലും അപകടങ്ങളുടെ തോത് വർദ്ധിക്കുകയാണ്. കൊടുംവളവുകൾ അപകടസാദ്ധ്യത വർദ്ധിപ്പിക്കുന്നു.
റോഡ് നിർമ്മാണത്തിലെ അപാകതകളും പല ദുരന്തങ്ങൾക്കും കാരണമാണ്.
