ഡൽഹി: രാജ്യത്ത് അരിക്ഷാമം രൂക്ഷമാകുന്നതിനിടെ വിചിത്ര നീക്കവുമായി കേന്ദ്രസർക്കാർ.
കൂടുതല്‍ അരി എഥനോള്‍ ഉല്‍പ്പാദനത്തിന് ഉപയോഗിക്കും.
റേഷൻ അരിയിലെ അടക്കം നുറുക്കരിയുടെ അളവ് മൂന്നിലൊന്നായി കുറയ്ക്കും.
അരിവില ഉയരുന്നതിനിടെ കേന്ദ്ര സർക്കാരിൻ്റെ നിർണായക തീരുമാനം. സ്റ്റോക്ക് എല്ലാ ആഴ്ചയും വെളിപ്പെടുത്താന്‍ തെക്കേ ഇന്ത്യൻ സംസ്ഥാനങ്ങള്‍ക്ക് കേന്ദ്രം നിര്‍ദേശം നല്‍കി.
കേരളത്തില്‍ പൊന്നി അരിക്ക് മൂന്ന് മാസത്തിനിടെ കൂടിയത് 20 രൂപയാണ്. അരിയുടെ ഉല്‍പ്പാദനം ഈ വർഷം കുറഞ്ഞേക്കുമെന്ന കണക്കുകള്‍ക്കിടയിലാണ് കൂടുതല്‍ അരി എഥനോള്‍ ഉല്‍പ്പാദനത്തിന് ഉപയോഗിക്കാൻ കേന്ദ്രം തീരുമാനിക്കുന്നത്. അരിമില്ലുകളില്‍ നിന്ന് എഥനോള്‍ നിർമ്മാണത്തിനായി നുറുക്ക് അരി സംഭരിക്കാൻ കേന്ദ്ര സർക്കാർ തീരുമാനിച്ചു.
അടുത്ത വർഷം മുതല്‍ അരിയില്‍ നുറുക്ക് അരി സാന്നിധ്യം 16ല്‍ നിന്ന് 5 ശതമാനത്തിലേക്ക് കുറയ്ക്കാൻ ആണ് നിർദേശം. എഥനോള്‍ നിർമാണത്തിന് വേണ്ടി ആണ് കൂടുതല്‍ നുറുക്ക് അരി സംഭരിക്കുന്നത്.
രാജ്യത്തെ അരിക്ഷാമം എഥനോള്‍ നിർമ്മാണത്തെ ബാധിച്ചതോടെയാണ് നുറുക്ക് അരിയില്‍ പിടി വീഴുന്നത്. പൊതുവിതരണത്തിനായുള്ള അരിയുടെ അളവ് ഗണ്യമായി കുറഞ്ഞേക്കും.
സംസ്ഥാനത്തും ഇത് നടപ്പിലാക്കാൻ സപ്ലൈകോ നീക്കങ്ങള്‍ തുടങ്ങി. 42 അരി മില്ലുകളുമായി സപ്ലൈകോ ധാരണ ഉണ്ടാക്കിയതായി റൈസ് മില്‍സ് അസോസിയേഷൻ പറയുന്നു. അരിയുടെ ഗുണ നിലവാരം കൂട്ടുന്നതിനാണ് പുതിയ മാറ്റം എന്നാണ് പൊതുവിതരണ മന്ത്രാലയത്തിൻ്റെ വിശദീകരണം.
