തിരുവനന്തപുരം: എറണാകുളം ചേരാനെല്ലൂർ വാഹനാപകടത്തില്‍ നിയമം അനുശാസിക്കുന്ന ശിക്ഷ ഉറപ്പാക്കുമെന്നും മരിച്ച ജയപാലകൃഷ്ണന്റെ ബന്ധുക്കള്‍ക്ക് ആശങ്ക വേണ്ടെന്നും ആഭ്യന്തര മന്ത്രി രമേശ് ചെന്നിത്തല പറഞ്ഞു.
വിവരാവകാശ നിയമത്തില്‍ സർക്കാർ വെള്ളം ചേർക്കില്ലെന്നും മന്ത്രി വ്യക്തമാക്കി. ചില അന്വേഷണങ്ങള്‍ പൂർത്തിയാക്കാൻ ഫയലുകള്‍ രഹസ്യമായി സൂക്ഷിക്കേണ്ടതുണ്ട്.
വിജിലൻസ് അന്വേഷണ സംഘം ആവശ്യപ്പെട്ട പ്രകാരമാണ് ചില ഫയലുകള്‍ വിവരാവകാശ പരിധിയില്‍നിന്നും ഒഴിവാക്കിയത്.
എന്നാല്‍ എന്നെന്നേക്കുമായി ഫയലുകള്‍ രഹസ്യമായി സൂക്ഷിക്കില്ല. സർക്കാരിന് ഒന്നും മറച്ചുവയ്ക്കാനില്ലെന്നും രമേശ് ചെന്നിത്തല കൂട്ടിച്ചേർത്തു.
അതേസമയം ഗവർണറുടെ കത്തിനെക്കുറിച്ച്‌ അറിയില്ലെന്നും സർക്കാരിനെ അറിയിച്ചിട്ടായിരിക്കില്ല ഗവർണർ കത്തയച്ചതെന്നും രമേശ് ചെന്നിത്തല പറഞ്ഞു.
പിഎസ്‍സിക്ക് എതിരേ ധാരാളം പരാതികള്‍ ലഭിക്കുന്നുണ്ട്. ക്രമക്കേടുകളില്‍ ക്രൈംബ്രാഞ്ച് അന്വേഷണം ശരിയായ രീതിയില്‍ നടക്കും. കോടതിയുടെ വിമർശനത്തെ ശരിയായ അർഥത്തില്‍ ഉള്‍ക്കൊള്ളുന്നു. പിഎസ്‍സിയുടെ വിശ്വാസ്യത വീണ്ടെടുക്കുമെന്നും രമേശ് ചെന്നിത്തല പറഞ്ഞു.
