കൊച്ചി: ചേരാനല്ലൂരില്‍ അഡീഷണല്‍ സെഷന്‍സ് ജഡ്ജിയുടെ പ്രായപൂര്‍ത്തിയാകാത്ത മകന് ഓടിച്ച ബെന്‍സ് കാറിടിച്ച്‌ തട്ടുകട ഉടമ മാഞ്ഞാലി സ്വദേശി ജയബാലകൃഷ്ണന്‍ കൊല്ലപ്പെട്ട സംഭവത്തില്‍ പിതാവായ ജഡ്ജിക്കെതിരേ കേസെടുക്കാന്‍ പോലീസ് നീക്കം.
പ്രായപൂര്‍ത്തിയാവാത്ത മകന് വാഹനമോടിക്കാന്‍ കൊടുത്തതിന്റെ പേരിലാണ് കേസെടുക്കുക. അപകടത്തിന് പിന്നാലെ പിടിയിലായ 17-കാരന്‍ പൊലീസിന് നല്‍കിയ മൊഴികളും പൊലീസിന്റെ പ്രാരംഭ നീക്കങ്ങളും വലിയ വിവാദങ്ങള്‍ക്ക് തിരികൊളുത്തിയിരിക്കുകയാണ്. അര്‍ദ്ധരാത്രിയില്‍ ആലുവയിലെ ഫ്‌ലാറ്റില്‍ നിന്ന് ആഡംബര കാറെടുത്ത് റോഡിലിറങ്ങിയത് വെറുതെ ഒന്ന് കറങ്ങാന്‍ മാത്രമാണെന്നും, യൂട്യൂബ് നോക്കിയാണ് താന്‍ ഡ്രൈവിങ് പഠിച്ചതെന്നുമാണ് കസ്റ്റഡിയിലുള്ള കുട്ടി പോലീസിന് നല്‍കിയിരിക്കുന്ന വിചിത്രമായ മൊഴി. അപകടസമയത്ത് മുന്നില്‍ സ്‌കൂട്ടര്‍ പോകുന്നത് കണ്ടില്ലെന്നും, ശക്തമായ മഴയായതിനാല്‍ റോഡ് വ്യക്തമായി കാണാന്‍ സാധിച്ചിരുന്നില്ലെന്നുമാണ് പ്രതിയുടെ ന്യായീകരണം.
എന്നാല്‍ യൂട്യൂബ് മാത്രം കണ്ട് പഠിച്ച ഒരാള്‍ക്ക് സാധിക്കാത്ത വിധം അതീവ വിദഗ്ദ്ധനായ ഒരു പ്രൊഫഷണല്‍ ഡ്രൈവറെ പോലെയാണ് കുട്ടി കാര്‍ നിയന്ത്രിച്ചിട്ടുള്ളതെന്നാണ് സ്ഥലത്തെ സിസിടിവി ദൃശ്യങ്ങളും വാഹനം കടന്നുപോയ റൂട്ടുകളും പരിശോധിച്ച വിദഗ്ദ്ധര്‍ ചൂണ്ടിക്കാണിക്കുന്നത്. പലയിടങ്ങളിലും കൃത്യതയോടെ യൂടേണ്‍ എടുത്തതടക്കം ഈ വാദത്തെ ഖണ്ഡിക്കുന്നുണ്ട്. അപകടത്തിന് തൊട്ടുപിന്നാലെ ആരെല്ലാമായോ ഫോണില്‍ ബന്ധപ്പെടുകയും പുറത്തുനിന്ന് ലഭിച്ച നിര്‍ദ്ദേശങ്ങളുടെ അടിസ്ഥാനത്തിലാണ് കുട്ടി ഇത്തരം മൊഴികള്‍ നല്‍കുന്നതെന്നുമാണ് അന്വേഷണ സംഘത്തിന്റെ ശക്തമായ വിലയിരുത്തല്‍. കേസന്വേഷണത്തില്‍ നിന്ന് വാഹനത്തിന്റെ ഉടമയെയും രക്ഷിച്ചെടുക്കാനുള്ള ബോധപൂര്‍വ്വമായ തിരക്കഥയാണോ ഇതെന്ന സംശയമാണ് ബലപ്പെടുന്നത്.
അപകടവിവരമറിഞ്ഞ് ചേരാനല്ലൂര്‍ പൊലീസ് സ്റ്റേഷനിലെത്തിയ ജയബാലകൃഷ്ണന്റെ ബന്ധുക്കളോട് പ്രതിയുടെ പിതാവായ ജഡ്ജി മോശമായ രീതിയിലുമാണ് പെരുമാറിയതെന്നും ആരോപണം ഉയര്‍ന്നിരുന്നു. പ്രായപൂര്‍ത്തിയാകാത്ത കുട്ടിക്ക് വാഹനം നല്‍കിയവരാണ് തെറ്റുകാരെന്ന് ചൂണ്ടിക്കാണിച്ചപ്പോള്‍, 'നിങ്ങളെന്നെ . ചോദ്യം ചെയ്യാന്‍ വരണ്ട, അതിന് നിങ്ങള്‍ ആയിട്ടില്ല' എന്നായിരുന്നു ജഡ്ജിയുടെ മറുപടി. ഇതൊന്നും തനിക്ക് ഒരു പ്രശ്‌നവുമില്ലെന്ന അഹങ്കാരത്തോടെയുള്ള നിലപാടാണ് ജഡ്ജിയുടെ ഭാഗത്തുനിന്നും ഉണ്ടായതെന്ന് ബന്ധുക്കള്‍ സങ്കടത്തോടെ പറയുന്നു. മാത്രമല്ല, സ്റ്റേഷനില്‍ വെച്ച്‌ മാധ്യമപ്രവര്‍ത്തകര്‍ പ്രതിയുടെ ഫോട്ടോയെടുത്തപ്പോള്‍ അത് പെട്ടെന്ന് ഡിലീറ്റ് ചെയ്യണമെന്നും അല്ലെങ്കില്‍ തനിക്ക് വലിയ പ്രശ്‌നമാകുമെന്നും പറഞ്ഞ് പൊലീസ് ഭീഷണിപ്പെടുത്തിയതായും, തന്റെ കൈയില്‍ നിന്ന് ഫോണ്‍ പിടിച്ചുവാങ്ങി ഫോട്ടോ ഡിലീറ്റ് ചെയ്യിച്ചതായും ബന്ധുക്കള്‍ ആരോപിക്കുന്നുണ്ട്. വെള്ളക്കെട്ട് ഉണ്ടായതുകൊണ്ടാണ് അപകടം നടന്നതെന്ന രീതിയില്‍ ന്യായീകരണങ്ങള്‍ നിരത്താന്‍ ശ്രമം നടക്കുന്നുണ്ടെങ്കിലും, കണ്ടെയ്‌നര്‍ റോഡില്‍ യാതൊരു വെള്ളക്കെട്ടും ഉണ്ടായിരുന്നില്ലെന്നും വെള്ളം ഒഴുകി പോകാന്‍ കൃത്യമായ സൗകര്യമുള്ള സ്ഥലത്താണ് അപകടം നടന്നതെന്നും കുടുംബം വ്യക്തമാക്കുന്നു.
വാഹനമോടിച്ച 17-കാരന്റെ പേരിലും വാഹനത്തിന്റെ ആര്‍.സി ഉടമയായ പിതാവിന്റെ പേരിലും കൊലക്കുറ്റത്തിന് കേസെടുക്കണമെന്നാണ് കുടുംബത്തിന്റെയും നാട്ടുകാരുടെയും ശക്തമായ ആവശ്യം. പ്രായപൂര്‍ത്തിയാകാത്ത കുട്ടിക്ക് വാഹനം എങ്ങനെയൊക്കെ ഉപയോഗിക്കാന്‍ അനുവാദം ലഭിച്ചു എന്നതിലും, അര്‍ദ്ധരാത്രിക്ക് ശേഷം പ്രായപൂര്‍ത്തിയാകാത്ത ഒരാള്‍ ഫ്‌ലാറ്റില്‍ നിന്ന് ആഡംബര കാറുമായി പുറത്തിറങ്ങിയിട്ടും വീട്ടുകാര്‍ ഒന്നും അറിഞ്ഞില്ലെന്ന വാദം അവിശ്വസനീയമാണെന്നും പൊലീസ് ചൂണ്ടിക്കാണിക്കുന്നു. പ്രതി മദ്യപിച്ചിട്ടില്ലെന്നാണ് പൊലീസിന്റെ പ്രാഥമിക വാദമെങ്കിലും, ലഹരിവസ്തുക്കള്‍ എന്തെങ്കിലും ഉപയോഗിച്ചിട്ടുണ്ടോ എന്ന് കണ്ടെത്താന്‍ വിശദമായ പരിശോധനകള്‍ നടത്തണമെന്നും കുടുംബം ആവശ്യപ്പെടുന്നുണ്ട്.
നിലവില്‍ ബിഎന്‍എസ്സിലെ 281, 106 (1) എന്നീ വകുപ്പുകളാണ് പ്രതിക്കെതിരെ ചുമത്തിയിരിക്കുന്നത്. എന്നാല്‍ നിയമപരമായ സമ്മര്‍ദ്ദങ്ങളെ തുടര്‍ന്ന് ജഡ്ജിയായ പിതാവിനെ പ്രതിചേര്‍ക്കുന്നതില്‍ നിന്ന് ഒഴിവാക്കാന്‍ ബോധപൂര്‍വ്വം ശ്രമങ്ങള്‍ നടക്കുന്നുണ്ടെന്ന ആക്ഷേപം ശക്തമായ പശ്ചാത്തലത്തില്‍, പ്രായപൂര്‍ത്തിയാകാത്ത കുട്ടിക്ക് വാഹനം നല്‍കിയ മാതാപിതാക്കള്‍ക്കെതിരെയും നിയമനടപടി സ്വീകരിക്കാനുള്ള തീവ്രശ്രമത്തിലാണ് പൊലീസ്. ജുവനൈല്‍ ജസ്റ്റിസ് ബോര്‍ഡിന്റെ അനുമതിക്ക് ശേഷം പ്രതിയെ കോടതിയില്‍ ഹാജരാക്കാനാണ് തീരുമാനം. തട്ടുകട നടത്തി ലഭിച്ചിരുന്ന ചെറിയ വരുമാനം കൊണ്ട് മാത്രം കുടുംബം പുലര്‍ത്തിയിരുന്ന ജയപാലകൃഷ്ണന്റെ അപ്രതീക്ഷിത വിയോഗം വലിയ കടബാധ്യതകളിലേക്കാണ് ആ കുടുംബത്തെ തള്ളിവിട്ടിരിക്കുന്നത്
