തിരുവനന്തപുരം: ഭർത്താവിന്റെ ബാധ ഒഴിപ്പിക്കാനെത്തിയ വീട്ടമ്മയെ പീഡിപ്പിച്ച കേസില്‍ പൂജാരി രാജേഷിന് തിരുവനന്തപുരം പ്രത്യേക കോടതി ഏഴുവർഷം കഠിനതടവ് ശിക്ഷിച്ചു.
50,000 രൂപ പിഴയും കോടതി വിധിച്ചു. പിഴ അടച്ചില്ലെങ്കില്‍ ഒരു വർഷം കൂടി തടവ് അനുഭവിക്കണം.പട്ടികജാതി-പട്ടികവർഗ പീഡന നിരോധന നിയമം വിചാരണ ചെയ്യുന്ന പ്രത്യേക കോടതി ജഡ്ജി എ. ഷാജഹാനാണ് ശിക്ഷ പ്രഖ്യാപിച്ചത്. ഇടവ വെണ്‍കുളം മേക്കുളം വൈകുണ്ഡം വീട്ടില്‍ രാജേഷാണ് കേസിലെ പ്രതി.2016 ഏപ്രിലിലായിരുന്നു സംഭവം.
ഭർത്താവിന്റെ ബാധ ഒഴിപ്പിക്കാനുള്ള പ്രത്യേക പൂജയ്ക്ക് എത്താൻ പറഞ്ഞ പ്രതി, വീട്ടമ്മയെ ക്ഷേത്രത്തിന്റെ സ്റ്റോർ റൂമില്‍ വെച്ച്‌ പീഡിപ്പിച്ചതായി കേസ് പറയുന്നു.പല ദിവസങ്ങളിലായി പീഡനം തുടർന്നുവെന്നുമാണ് കേസ് രേഖകളില്‍ പറയുന്നത്. സംഭവത്തെ തുടർന്ന് നടത്തിയ വിചാരണയിലാണ് കോടതി ശിക്ഷ വിധിച്ചത്.പ്രോസിക്യൂഷനുവേണ്ടി സന്ദീപ് ആർ.എൻ. ഹാജരായി. തിരുവനന്തപുരം എസ്.സി/എസ്.ടി പ്രത്യേക കോടതിയുടെ വിധി കേസില്‍ നിർണായകമായി.
