ഡൽഹി: ഇന്ത്യൻ റെയില്‍വേയിലെ സ്റ്റേഷൻ മാസ്റ്റർ തസ്തികകളിലേക്ക് പുതിയ റിക്രൂട്ട്‌മെന്റിനായി അപേക്ഷ ക്ഷണിച്ചു.
ഏകദേശം 1,250 ഒഴിവുകളിലേക്കുള്ള ഹ്രസ്വ വിജ്ഞാപനം റെയില്‍വേ റിക്രൂട്ട്‌മെന്റ് ബോർഡ് പുറപ്പെടുവിച്ചു. താല്പര്യമുള്ള ഉദ്യോഗാർഥികള്‍ക്ക് ഒക്ടോബർ 27 മുതല്‍ ഓണ്‍ലൈനായി അപേക്ഷ സമർപ്പിക്കാവുന്നതാണ്. നവംബർ 26 ആണ് അപേക്ഷ സമർപ്പിക്കാനുള്ള അവസാന തിയതി.എങ്ങനെ അപേക്ഷിക്കാംസ്റ്റേഷൻ മാസ്റ്റർ തസ്തികയിലേക്കുള്ള അപേക്ഷകള്‍ ഓണ്‍ലൈനായി മാത്രമേ സ്വീകരിക്കുകയുള്ളൂ. യോഗ്യരായ ഉദ്യോഗാർഥികള്‍ക്ക് rrbapply.gov.in എന്ന ഔദ്യോഗിക വെബ്‌സൈറ്റ് വഴി അപേക്ഷകള്‍ സമർപ്പിക്കാം.നിലവില്‍ പുറത്തിറക്കിയ ഹ്രസ്വ വിജ്ഞാപനത്തില്‍ യോഗ്യതാ മാനദണ്ഡങ്ങള്‍ വ്യക്തമായി പരാമർശിച്ചിട്ടില്ലെങ്കിലും, ഉടൻ പുറത്തിറങ്ങുന്ന വിശദമായ വിജ്ഞാപനത്തില്‍ ഇവ ലഭ്യമാകും.
അപേക്ഷാ നടപടികള്‍ ആരംഭിക്കുന്നതിന് മുൻപായി ആവശ്യമായ രേഖകളും സർട്ടിഫിക്കറ്റുകളും മുൻകൂട്ടി തയ്യാറാക്കി വെക്കാൻ ഉദ്യോഗാർഥികളെ ഓർമിപ്പിക്കുന്നതിനാണ് റെയില്‍വേ ഇപ്പോള്‍ ഹ്രസ്വ വിജ്ഞാപനം പുറപ്പെടുവിച്ചിരിക്കുന്നത്.സ്റ്റേഷൻ മാസ്റ്റർ റിക്രൂട്ട്‌മെന്റുമായി ബന്ധപ്പെട്ട ഹ്രസ്വ വിജ്ഞാപനത്തോടൊപ്പം ഉദ്യോഗാർഥികള്‍ക്കായി റെയില്‍വേ റിക്രൂട്ട്‌മെന്റ് ബോർഡ് പ്രത്യേക ജാഗ്രതാ നിർദേശവും പുറപ്പെടുവിച്ചിട്ടുണ്ട്. അപേക്ഷ നല്‍കുന്നതിന് മുൻപായി ആധാർ കാർഡിലെ വിവരങ്ങള്‍ കൃത്യമാണെന്ന് ഉദ്യോഗാർഥികള്‍ ഉറപ്പുവരുത്തേണ്ടതുണ്ട്.ആധാർ കാർഡിലെ പേരും ജനനത്തിയതിയും പത്താം ക്ലാസ് സർട്ടിഫിക്കറ്റിലെ വിവരങ്ങളുമായി പൂർണ്ണമായും പൊരുത്തപ്പെടുന്നതാണെന്ന് ഉറപ്പുവരുത്തണം. ആധാർ കാർഡിലുള്ള ഫോട്ടോ പഴയതാണെങ്കില്‍ ഏറ്റവും പുതിയതും വ്യക്തതയുള്ളതുമായ ഫോട്ടോ അപ്‌ഡേറ്റ് ചെയ്യാനും റെയില്‍വേ നിർദേശിക്കുന്നു.
