പാലക്കാട്: അപായച്ചങ്ങല വലിച്ചു ട്രെയിന് നിര്ത്തിയ സംഭവത്തില് റിട്ടയര്ഡ് റെയില്വേ സൂപ്രണ്ടിന് കോടതി സമന്സ്.
കോഴിക്കോട് നാദാപുരം വലിയപുരയില് വിജയനാണ് ഷൊര്ണൂര് റെയില്വേ കോടതിയില് ഹാജരാകാന് സമന്സ് ലഭിച്ചത്. ജൂണ് 15-ന് എറണാകുളം-കണ്ണൂര് ഇന്റര്സിറ്റി എക്സ്പ്രസില് ആലുവയില് നിന്നു കയറാന് ഡി1 കോച്ചില് റിസര്വ് ചെയ്ത വിജയനും കുടുംബത്തിനും നേരിടേണ്ടി വന്ന അനുഭവത്തെ തുടര്ന്നാണ് സംഭവം.
സ്റ്റേഷനിലെ ഡിസ്പ്ലേ ബോര്ഡില് കാണിച്ച സ്ഥാനത്തല്ല ട്രെയിന് നിര്ത്തിയത്. ജനറല് കോച്ച് വരേണ്ട സ്ഥലത്താണ് ഡി1 കോച്ച് നിര്ത്തിയത്. ഇത് കാരണം റിസര്വ് ചെയ്യാത്ത നിരവധി യാത്രക്കാര് ഈ കോച്ചില് കയറുകയും പിന്നീട് തിരിച്ചിറങ്ങുകയും ചെയ്തു. രണ്ട് മിനിറ്റ് സ്റ്റോപ്പുള്ള ട്രെയിന് ഒരു മിനിറ്റ് മാത്രമാണ് സ്റ്റേഷനില് നിര്ത്തിയതെന്നും, മുന്നോട്ടുനീങ്ങിയ ട്രെയിനില് വിജയന് കയറിയെങ്കിലും ഭാര്യയ്ക്കും മകള്ക്കും കയറാന് സാധിച്ചില്ലെന്നും അദ്ദേഹം പറയുന്നു. തുടര്ന്നാണ് ട്രെയിന് നിര്ത്താനായി അപായച്ചങ്ങല വലിച്ചത്. ഇതിന്റെ തെളിവുകള് നാഷനല് ട്രെയിന് എന്ക്വയറി സിസ്റ്റത്തില് നിന്ന് ശേഖരിച്ചിട്ടുണ്ടെന്നും അദ്ദേഹം വ്യക്തമാക്കി.
മതിയായ കാരണങ്ങളില്ലാതെ അപായച്ചങ്ങല വലിച്ചാല് 1000 രൂപ പിഴ അടയ്ക്കണമെന്നാണ് റെയില്വേ വ്യവസ്ഥ. എന്നാല് തെറ്റായ രീതിയില് ട്രെയിന് നിര്ത്തിയതാണ് പ്രശ്നങ്ങള്ക്ക് കാരണമെന്നതിനാല് പിഴ ഒടുക്കാന് വിജയന് തയാറായില്ല. തുടര്ന്നാണ് ആര്പിഎഫ് കേസില് കോടതി സമന്സ് അയച്ചത്. മതിയായ കാരണമാണോ എന്ന് നിശ്ചയിക്കുന്നത് ആരാണെന്ന് ചോദിച്ച് അദ്ദേഹം നല്കിയ വിവരാവകാശ അപേക്ഷയ്ക്ക് 'ചുമതലപ്പെട്ട അധികാരി' എന്ന് മാത്രമാണ് ഡിവിഷണല് റെയില്വേ സെക്യൂരിറ്റി കമാന്ഡന്റ് മറുപടി നല്കിയത്. ഏത് തസ്തികയിലുള്ള ആളാണ് ഈ അധികാരിയെന്ന് വ്യക്തമാക്കിയിട്ടുമില്ല.
