ഡല്‍ഹി: നവംബർ ഒന്നിന് ഡല്‍ഹിയില്‍ നടത്താൻ നിശ്ചയിച്ചിരിക്കുന്ന റാലി മാറ്റിവയ്‌ക്കണമെന്ന് ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധിയോട് കോണ്‍ഫെഡറേഷൻ ഓഫ് ഓള്‍ ഇന്ത്യ ട്രേഡേഴ്സ് (സിടിഐ) അഭ്യർത്ഥിച്ചു.
ദീപാവലി ആഘോഷങ്ങളോടനുബന്ധിച്ചുള്ള വ്യാപാരത്തെ നവംബർ ഒന്നിന് നടത്താൻ നിശ്ചയിച്ചിരിക്കുന്ന റാലി വിപരീതമായി ബാധിക്കുമെന്നു സിടിഐ ആശങ്കപ്പെടുന്നു.
റാലിയും അനുബന്ധ ഗതാഗത നിയന്ത്രണങ്ങളും വ്യാപാരത്തെ ബാധിച്ചാല്‍ വലിയ സാമ്പത്തിക നഷ്ടമുണ്ടാകുമെന്നാണ് സംഘടനയുടെ മുന്നറിയിപ്പ്.
ദീപാവലി വിപണിയില്‍ ഇടപാടുകള്‍ വർധിക്കുന്ന നിർണായക സമയത്താണ് റാലി നടത്തുന്നതെന്ന് വ്യാപാരികള്‍ ചൂണ്ടിക്കാട്ടുന്നു. അതിനാല്‍ നവംബർ 10ന് ശേഷത്തേക്ക് റാലി മാറ്റണമെന്നാണ് ആവശ്യം.
ധൻ തേരസ് മുതല്‍ ഭായ് ദൂജ് വരെ വൻ വ്യാപാരപ്രതീക്ഷ
ഈ വർഷം നവംബർ ആറിന് നടക്കുന്ന ധൻ തേരസ് ഉത്സവത്തോടനുബന്ധിച്ച്‌ ഡല്‍ഹിയില്‍ ഏകദേശം 25,000 കോടി രൂപയുടെ വ്യാപാരം നടക്കുമെന്നാണ് സിടിഐ പ്രതിനിധി ഗോയല്‍ വിശദീകരിച്ചത്. സ്വർണം, വെള്ളി, ഇലക്‌ട്രോണിക്സ്, വസ്ത്രങ്ങള്‍, പാത്രങ്ങള്‍, പഴങ്ങള്‍, മധുരപലഹാരങ്ങള്‍, വാഹനങ്ങള്‍, റിയല്‍ എസ്റ്റേറ്റ്, സമ്മാനവസ്തുക്കള്‍ തുടങ്ങിയ മേഖലകളില്‍ വലിയ തോതിലുള്ള ഇടപാടുകളാണ് പ്രതീക്ഷിക്കുന്നത്.
നവംബർ എട്ടിനാണ് ദീപാവലി ആഘോഷം. തുടർന്ന് നവംബർ 10ന് ഭായ് ദൂജ് ഉത്സവവും വരുന്നു. ആഘോഷങ്ങള്‍ക്ക് ഒരാഴ്ച മുമ്പുതന്നെ വിപണികളില്‍ തിരക്ക് വർധിക്കുകയും വ്യാപാരപ്രവർത്തനങ്ങള്‍ സജീവമാകുകയും ചെയ്യുന്നതിനാല്‍ ഈ സമയത്തെ ഗതാഗത തടസ്സങ്ങള്‍ കച്ചവടത്തെ ബാധിക്കുമെന്നാണ് വ്യാപാരികളുടെ ആശങ്ക.
ഒക്ടോബറില്‍ ₹3,000 കോടിയുടെ നഷ്ടമുണ്ടായെന്ന് സിടിഐ
സിടിഐയുടെ കണക്കുകള്‍ പ്രകാരം, ഒക്ടോബറില്‍ കൊണാട്ട് പ്ലേസ്, ഇന്ത്യാ ഗേറ്റ്, സെൻട്രല്‍ ഡല്‍ഹി തുടങ്ങിയ മേഖലകളില്‍ നടന്ന റാലികള്‍, ജാഥകള്‍, റോഡ് ഉപരോധങ്ങള്‍ എന്നിവ വ്യാപാരത്തെ ബാധിച്ചു. ഇതുമൂലം ഡല്‍ഹിയിലെ വ്യാപാരികള്‍ക്ക് ഏകദേശം 3,000 കോടി രൂപയുടെ നഷ്ടമുണ്ടായെന്നാണ് സംഘടനയുടെ കണക്ക്.
ഉത്സവസീസണില്‍ വിപണികള്‍ കൂടുതല്‍ സജീവമാകുന്ന സാഹചര്യത്തില്‍ പുതിയ റാലി വ്യാപാരികള്‍ക്ക് അധിക തിരിച്ചടിയാകുമെന്നാണ് സിടിഐയുടെ നിലപാട്. അതിനാല്‍ നവംബർ ഒന്നിലെ പരിപാടി മാറ്റിവച്ച്‌ ഉത്സവവ്യാപാരം തടസ്സമില്ലാതെ നടക്കാൻ അവസരമൊരുക്കണമെന്നാണ് സംഘടന രാഹുല്‍ ഗാന്ധിയോട് ആവശ്യപ്പെട്ടിരിക്കുന്നത്.
