തിരുവനന്തപുരം : രാഹുല്‍ ഗാന്ധിക്കെതിരെ അധിക്ഷേപ പരാമര്‍ശവുമായി ബിജെപി നേതാവ് ആര്‍ ശ്രീലേഖ. ഡല്‍ഹിയില്‍ നടക്കുന്നത് രാഹുല്‍ ഗാന്ധിയുടെ താണ്ഡവമാണെന്നും അമിതമായി മയക്കുമരുന്ന് കഴിച്ച ആളെ പോലെയാണ് രാഹുലിന്റെ പെരുമാറ്റമെന്നും സ്വന്തം മന്ത്രിമാരെ പോലും തള്ളിമാറ്റി താണ്ഡവമാടുകയാണ് എന്നുമാണ് ശ്രീലേഖയുടെ പരാമര്‍ശം.
കഴിഞ്ഞ ദിവസം ബിജെപി പുനലൂരില്‍ സംഘടിപ്പിച്ച ജനസഭയിലായിരുന്നു ശ്രീലേഖയുടെ പരാമര്‍ശം. പ്രസ്താവന പുറത്ത് വന്നതോടെ സമൂഹമാധ്യമങ്ങളില്‍ കോണ്‍ഗ്രസ് പ്രവര്‍ത്തകര്‍ വലിയ വിമര്‍ശനമുയര്‍ത്തി. എന്നാല്‍ ബിജെപി നേതാക്കളൊന്നും ഇതുവരെ വിഷയത്തില്‍ പ്രതികരിച്ചിട്ടില്ല.
ദിവസങ്ങള്‍ക്ക് മുമ്പാണ് ആര്‍ ശ്രീലേഖ തിരുവനന്തപുരം കോര്‍പറേഷനിലെ കൗണ്‍സിലര്‍ സ്ഥാനത്ത് നിന്നും രാജിവെക്കുകയാണെന്ന് അറിയിച്ച് മേയർക്ക് കത്ത് നൽകിയതും പിന്നീട് രാജി പിന്‍വലിക്കുകയും ചെയ്തത്. ബിജെപി നേതൃത്വം ശ്രീലേഖയെ അനുനയിപ്പിച്ച് പിന്‍വലിപ്പിക്കുകയായിരുന്നു. വ്യക്തിപരമാണ് രാജിയെന്നായിരുന്നു വിശദീകരണം.
