കോട്ടയം: നിയന്ത്രണം വിട്ട കാർ വീട്ടിലേക്ക് ഇടിച്ചുകയറി അപകടം. പുതുപ്പള്ളി നിരപ്പേൽപ്പടിക്ക് സമീപമായിരുന്നു സംഭവം. അപകടത്തിൽ വീടിന്റെ മുൻഭാഗവും കാറും പൂർണമായും തകർന്നു. ഇന്ന് രാവിലെ 7.30ഓടെയായിരുന്നു സംഭവം.
പുതുപ്പള്ളി ഭാഗത്ത് നിന്ന് ഞാലിയാകുഴി ഭാഗത്തേക്ക് പോകുകയായിരുന്ന കാർ, എതിർദിശയിൽ എത്തിയ ബൈക്കിനെ ഇടിക്കാതിരിക്കാൻ വെട്ടിച്ചപ്പോഴാണ് നിയന്ത്രണം നഷ്ടപ്പെട്ടത്. തുടർന്ന് മംഗലത്ത് പറമ്പിൽ എന്ന വീട്ടിലേക്ക് കാർ ഇടിച്ചുകയറുകയായിരുന്നു.
അപകടസമയത്ത് വീടിന്റെ മുൻവശത്ത് ആരും ഇല്ലാതിരുന്നതിനാൽ വലിയ ദുരന്തമാണ് ഒഴിവായത്. വീട്ടിലുണ്ടായിരുന്ന സ്ത്രീ പൂജാമുറിയിൽ വിളക്ക് തെളിയിക്കാൻ അകത്തേക്ക് കയറിയ സമയത്തായിരുന്നു അപകടമുണ്ടായത്.
രാവിലെ സമയങ്ങളിൽ സ്കൂൾ വിദ്യാർഥികൾ ഉൾപ്പെടെ നിരവധി പേർ ബസ് കാത്തുനിൽക്കുന്ന സ്ഥലമാണ് അപകടമുണ്ടായ പ്രദേശം. ആളപായമില്ലെങ്കിലും വീടിനും വാഹനത്തിനും കാര്യമായ നാശനഷ്ടമുണ്ടായിട്ടുണ്ട്.
