ആലപ്പുഴ: പുന്നപ്ര വയലാർ രക്തസാക്ഷി വാരാചരണത്തെ ചൊല്ലി ആലപ്പുഴയില്‍ സിപിഎം-സിപിഐ തർക്കം.
പുന്നപ്രയില്‍ സിപിഎം സ്മാരകത്തിന് പുറമെ സിപിഐ പുതിയ സ്മാരകം നിർമിച്ചതാണ് തർക്കത്തിന് കാരണം. സിപിഐയുടെ പുതിയ സ്മാരകത്തെ സിപിഎം അവഗണിച്ചെന്നാണ് ആരോപണം.
ഇതില്‍ പ്രതിഷേധിച്ച്‌ പുന്നപ്ര വയലാർ രക്തസാക്ഷി വാരാചരണ പരിപാടിയില്‍ നിന്ന് സിപിഐ വിട്ടുനിന്നു.
സിപിഐ നിർമിച്ച സ്മാരകത്തില്‍ സിപിഎം നേതാക്കള്‍ പതാക ഉയർത്താൻ എത്തിയില്ലെന്നാണ് സിപിഐയുടെ പരാതി.
അതേസമയം, സിപിഐ നിർമിച്ച മണ്ഡപത്തെ രക്തസാക്ഷി മണ്ഡപമായി അംഗീകരിക്കാൻ കഴിയില്ലെന്ന നിലപാടിലാണ് സിപിഎം. ഇതോടെയാണ് ഇരു പാർട്ടികളും തമ്മിലുള്ള ഭിന്നത രൂക്ഷമായത്.
തർക്കം പരിഹരിക്കാൻ സിപിഎം, സിപിഐ ജില്ലാ സെക്രട്ടറിമാർ തമ്മില്‍ ആശയവിനിമയവും കൂടിക്കാഴ്ചയും നടത്തിയതായാണ് വിവരം. കൂടുതല്‍ പരസ്യപ്രതികരണങ്ങളിലേക്ക് പോകാതെ പ്രശ്നം പരിഹരിക്കാനുള്ള ശ്രമത്തിലാണ് ഇരു പാർട്ടികളിലെയും നേതാക്കള്‍.
വിഷയത്തില്‍ പ്രതികരിക്കാനില്ലെന്നാണ് ജില്ലയിലെ മുതിർന്ന നേതാക്കളുടെ നിലപാട്. ഒരാഴ്ച നീണ്ടുനില്‍ക്കുന്ന പുന്നപ്ര വയലാർ രക്തസാക്ഷി വാരാചരണം കഴിഞ്ഞ ദിവസമാണ് ആരംഭിച്ചത്.
ഈ മാസം 27ന് നടക്കുന്ന സമാപന സമ്മേളനം പ്രതിപക്ഷ നേതാവ് പിണറായി വിജയൻ ഉദ്ഘാടനം ചെയ്യും.
