ഡല്‍ഹി: ഇന്ത്യൻ ഒളിമ്പിക് അസോസിയേഷൻ(ഐഒഎ) തെരഞ്ഞെടുപ്പില്‍ പി ടി ഉഷയ്ക്ക് ആശ്വാസം. ഐഒഎ ജനറല്‍ കൗണ്‍സിലിലേക്ക് ഐസ് ഹോക്കി അസോസിയേഷൻ സമർപ്പിച്ച പ്രതിനിധികളുടെ പട്ടികയ്ക്ക് വരണാധികാരി അംഗീകാരം നല്‍കി.
പി ടി ഉഷയെ ഐസ് ഹോക്കി അസോസിയേഷൻ പ്രതിനിധിയായി നാമനിർദേശം ചെയ്തതിനെതിരേ ഐസ് ഹോക്കി അസോസിയേഷനിലെ ഒരുവിഭാഗം പരാതി നല്‍കിയിരുന്നു. എന്നാല്‍, ഈ പരാതി വരണാധികാരി തള്ളി. ഐഒഎ, ഐസ് ഹോക്കി അസോസിയേഷൻ ഭാരവാഹികളുടെ മറുപടികള്‍ പരിഗണിച്ചാണ് തീരുമാനം. അതേസമയം, ഐഒഎ എക്സിക്യൂട്ടീവ് കൗണ്‍സില്‍ തെരഞ്ഞെടുപ്പിന്റെ അന്തിമ വോട്ടർ പട്ടിക ഞായറാഴ്ച പുറത്തിറക്കും.
ഡിസംബർ അഞ്ചിനാണ് ഐഒഎ എക്സിക്യൂട്ടീവ് കൗണ്‍സില്‍ തെരഞ്ഞെടുപ്പ്. ഇതിനുമുന്നോടിയായി ഐഒഎ ജനറല്‍ കൗണ്‍സിലിലേക്ക് നടന്ന തെരഞ്ഞെടുപ്പില്‍ നിലവിലെ ഒളിമ്പിക് അസോസിയേഷൻ അധ്യക്ഷയായ പി ടി ഉഷയ്ക്ക് അപ്രതീക്ഷിത തോല്‍വിയാണുണ്ടായത്. ജനറല്‍ കൗണ്‍സിലിലെ സ്പോർട്സ് പേഴ്സണ്‍ ഓഫ് ഔട്ട്സ്റ്റാൻഡിങ് മെറിറ്റ്(എസ്‌ഒഎം) വിഭാഗം വനിതാ താരങ്ങളുടെ തെരഞ്ഞെടുപ്പിലാണ് പി ടി ഉഷ പരാജയപ്പെട്ടത്. അഞ്ജു ബോബി ജോർജ്, റാണി രാംപാല്‍, ഡോള ബാനർജി, സൈന നേവാള്‍ എന്നിവരാണ് ഈ വിഭാഗത്തില്‍നിന്ന് തെരഞ്ഞെടുക്കപ്പെട്ടത്. ഇതോടെ പി ടി ഉഷയ്ക്ക് ജനറല്‍ കൗണ്‍സിലിലേക്ക് എത്താനുള്ള സാധ്യതകള്‍ മങ്ങി. എന്നാല്‍, ഇതിനുപിന്നാലെയാണ് നാടകീയനീക്കത്തിലൂടെ ഐസ് ഹോക്കി അസോസിയേഷന്റെ പ്രതിനിധിയായി പി ടി ഉഷയെ ജനറല്‍ കൗണ്‍സിലിലേക്ക് നാമനിർദേശം ചെയ്തത്.
രാജ്യത്തെ ദേശീയ കായിക സംഘടനകള്‍ക്ക് ഓരോ പുരുഷനെയും സ്ത്രീയെയും ജനറല്‍ കൗണ്‍സിലിലേക്ക് നാമനിർദേശം ചെയ്യാനാകും. ഈ നാമനിർദേശത്തിലൂടെയാണ് ഐസ് ഹോക്കി അസോസിയേഷൻ പ്രതിനിധിയായി പി ടി ഉഷ ജനറല്‍ കൗണ്‍സിലില്‍ തിരിച്ചെത്തിയത്.
പി ടി ഉഷയെ ഐസ് ഹോക്കി അസോസിയേഷൻ പ്രതിനിധിയായി നാമനിർദേശം ചെയ്തതിനെതിരേ ഐസ് ഹോക്കി അസോസിയേഷനിലെ ഒരുവിഭാഗം രംഗത്തെത്തിയിരുന്നു. കായിക സംഘടനകള്‍ നാമനിർദേശം ചെയ്യുന്നവർ അതത് സംഘടനകളില്‍ അംഗമാകണമെന്ന വ്യവസ്ഥയുണ്ടെന്ന് ആരോപിച്ചാണ് ഇവർ പരാതി നല്‍കിയിരുന്നത്. എന്നാല്‍, ഈ പരാതിയാണ് വരണാധികാരി തള്ളിയത്.
