.തിരുവനന്തപുരം: നെടുമങ്ങാട്‌ ജില്ലാ ആശുപത്രിയില്‍ ഇരുപത്തിനാലുകാരിയായ യുവ വനിതാ ഡോക്‌ടര്‍ക്കെതിരേ സീനിയര്‍ ഡോക്‌ടറുടെ ലൈംഗികാതിക്രമശ്രമം.
സംഭവത്തില്‍ ജനറല്‍ സര്‍ജറി വിഭാഗം ജൂനിയര്‍ കണ്‍സള്‍ട്ടന്റായ ഡോ. എന്‍.കെ. ബിനുവിനെ പോലീസ് അറസ്‌റ്റ് ചെയ്‌തു. കോടതിയില്‍ ഹാജരാക്കിയ പ്രതിയെ 14 ദിവസത്തേക്ക്‌ റിമാന്‍ഡ്‌ ചെയ്‌തു. ആരോഗ്യവകുപ്പ്‌ സര്‍വീസില്‍നിന്ന്‌ സസ്‌പെന്‍ഡ്‌ ചെയ്‌തു.
സ്വകാര്യ ഡെന്റല്‍ കോളജില്‍നിന്ന്‌ പി.ജി. കോഴ്‌സിന്റെ ഭാഗമായി പരിശീലനത്തിനെത്തിയ ഡോക്‌ടറാണ്‌ അതിക്രമത്തിനിരയായത്‌. നെടുമങ്ങാട്‌ ജില്ലാ ആശുപത്രിയിലെ ഡെന്റല്‍ വിഭാഗത്തില്‍ ഇന്റേണ്‍ഷിപ്പ്‌ ചെയ്യുകയായിരുന്നു യുവതി. ശരീരത്തിലുണ്ടായ തടിപ്പിനെക്കുറിച്ച്‌ രാവിലെ ആശുപത്രിയിലെ ക്ലാസിനിടെ സീനിയര്‍ ഡോക്‌ടറുമായി സംസാരിച്ചിരുന്നു. വിശദമായ പരിശോധനയ്‌ക്കായി ഉച്ചയ്‌ക്കുശേഷം സ്വകാര്യ പ്രാക്‌ടീസ്‌ നടത്തുന്ന മുറിയിലെത്താന്‍ ഡോക്‌ടര്‍ നിര്‍ദേശിച്ചു. അവിടെവച്ച്‌ ലൈംഗികാതിക്രമത്തിന്‌ ശ്രമിച്ചെന്നാണ്‌ പരാതി. അതിക്രമശ്രമത്തെ ചെറുത്ത യുവതി മുറിയില്‍നിന്ന്‌ കുതറിയോടി രക്ഷപ്പെടുകയായിരുന്നു.
തുടര്‍ന്ന്‌ ആശുപത്രി സൂപ്രണ്ടിന്‌ പരാതി നല്‍കി. സൂപ്രണ്ട്‌ വിവരം പോലീസിനെ അറിയിച്ചെങ്കിലും കേസെടുക്കാന്‍ വൈകിയെന്നാണ്‌ ആക്ഷേപം. ഉച്ചയ്‌ക്ക് 2.30ന്‌ പോലീസ് സ്‌റ്റേഷനിലെത്തിയ യുവതിയുടെ മൊഴിയെടുക്കല്‍ രാത്രി 8.30 വരെ നീണ്ടു. ആറു മണിക്കൂറോളം സ്‌റ്റേഷനില്‍ ഇരുത്തി മൊഴിയെടുത്ത്‌ മാനസികമായി തളര്‍ത്തിയെന്ന ആരോപണവും ഉയര്‍ന്നിട്ടുണ്ട്‌. പരാതിയില്‍ അടിയന്തര നടപടി സ്വീകരിക്കാതെ പരാതിക്കാരിയെ സ്‌റ്റേഷനിലേക്ക്‌ വിളിച്ചുവരുത്തിയതിലും പ്രതിഷേധമുയര്‍ന്നു.
പോലീസിന്റെ നടപടിയിലെ കാലതാമസത്തില്‍ പ്രതിഷേധിച്ച്‌ ഡി.വൈ.എഫ്‌.ഐ പ്രവര്‍ത്തകര്‍ രാത്രി നെടുമങ്ങാട്‌ പോലീസ് സ്‌റ്റേഷനു മുന്നില്‍ പ്രകടനം നടത്തി. നേതാക്കള്‍ സ്‌റ്റേഷനു മുന്നില്‍ കുത്തിയിരുന്ന്‌ പ്രതിഷേധിക്കുകയും വനിതാ ഡോക്‌ടര്‍ക്ക്‌ നീതി ലഭ്യമാക്കണമെന്ന്‌ ആവശ്യപ്പെടുകയും ചെയ്‌തു.
തുടര്‍ന്ന്‌ കുമാരപുരത്തെ വീട്ടില്‍നിന്നാണ്‌ ഡോ. ബിനുവിനെ പോലീസ് കസ്‌റ്റഡിയിലെടുത്തത്‌. അറസ്‌റ്റ് രേഖപ്പെടുത്തിയശേഷം കോടതിയില്‍ ഹാജരാക്കുകയായിരുന്നു. സര്‍ക്കാര്‍ ഡോക്‌ടറായിരിക്കെ ഡ്യൂട്ടി സമയത്ത്‌ സ്വകാര്യ പ്രാക്‌ടീസ്‌ നടത്തിയതും അച്ചടക്കലംഘനമായി ചൂണ്ടിക്കാട്ടിയാണ്‌ ആരോഗ്യവകുപ്പ്‌ സസ്‌പെന്‍ഡ്‌ ചെയ്‌തത്‌.
