തിരുവനന്തപുരം: പിഎസ് സി പരീക്ഷാ തട്ടിപ്പില്‍ ഒളിവിലായിരുന്ന അഡീഷനല്‍ സെക്രട്ടറി ആർ ഹരി അറസ്റ്റില്‍.
കോയമ്പത്തൂരിലെ ഈശാ യോഗ കേന്ദ്രത്തില്‍ ഒളിവിലായിരുന്ന ഹരി എറണാകുളത്തെ ബന്ധുവീട്ടില്‍ എത്തിയതിന് പിന്നാലെയാണ് അറസ്റ്റ് ചെയ്തത്.
ക്രമക്കേട് നടന്ന ആസൂത്രണ ബോർഡ് പരീക്ഷയുടെ മൂല്യനിർണ്ണയച്ചുമതലയായിരുന്നു ഹരിക്ക്. ഹരിക്കൊപ്പം മൂല്യനിർണ്ണയ ചുമതലയുണ്ടായിരുന്ന ഡെപ്യൂട്ടി സെക്രട്ടറിയായിരുന്ന പി സതീഷിനെ കഴിഞ്ഞ ദിവസമാണ് അറസ്റ്റ് ചെയ്തത്. പ്രതി ചേർത്തതിന് പിന്നാലെ ഹരിയെ സസ്പെൻഡ് ചെയ്തിരുന്നു. ചെയർമാൻ എംആർ ബൈജുവിന്‍റെ വലംകൈയാണ് ഹരി. ചെയർമാനും ഹരിയും ചേർന്നാണ് കൂടിയാലോചന ഇല്ലാതെ എല്ലാ തീരുമാനങ്ങളെടുക്കുന്നുവെന്ന് കഴിഞ്ഞ ദിവസം കമ്മീഷനിലെ ചില അംഗങ്ങള്‍ ക്രൈം ബ്രാഞ്ചിന് മൊഴി നല്‍കിയിരുന്നു. പിഎസ് സി സെക്രട്ടറിയെ കേസില്‍ നാളെ ചോദ്യം ചെയ്യും.
കേസില്‍ നാളെ പിഎസ്സി സെക്രട്ടറി സാജു ജോർജ്ജിനെ ചോദ്യം ചെയ്യും. നാളെ രണ്ടുമണിക്ക് ഹാജരാകാനായി ഇന്ന് ക്രൈം ബ്രാഞ്ച് നോട്ടീസ് നല്‍കിയിട്ടുണ്ട്. പരീക്ഷ കണ്‍ട്രോളർ ബിനി കെ.എബ്രഹാമിനെ തിങ്കളാഴ്ച ചോദ്യം ചെയ്യാനും നോട്ടീസ് നല്‍കി. തിങ്കളാഴ്ച മുതല്‍ പത്ത് പിഎസ്സി അംഗങ്ങളോടും ഹാജരാനായി നോട്ടീസ് നല്‍കിയിട്ടുണ്ട്. അന്വേഷണ സംഘത്തേയും വിപുലപ്പെടുത്തി. പ്രത്യേക സംഘത്തില്‍ രണ്ട് എസ്പിമാരെയും ഒരു ഡിവൈഎസ്പിയെയും ഉള്‍പ്പെടുത്തി. പുതുതായി മൂന്നു കേസുകള്‍ കൂടി രജിസ്റ്റർ ചെയ്തതുകൊണ്ടാണ് അന്വേഷണ സംഘം വിപുലപ്പെടുത്തിയത്. പുതിയ കേസുകള്‍ രണ്ട് എസ്പിമാരും ഡിവൈഎസ്പിയും അന്വേഷിക്കാന കൈമാറി.
