തിരുവനന്തപുരം∙ വിവാദമായ ആസൂത്രണ ബോർഡ് ചീഫ് (ഇൻഡസ്ട്രി ആൻഡ് ഇൻഫ്രാസ്ട്രക്ചർ) തസ്തികയിലേക്കുള്ള
പിഎസ്‌സിയുടെ പുതിയ റാങ്ക് ലിസ്റ്റിൽ പരാതിക്കാരനായ ശ്യാം കൃഷ്ണന് ഒന്നാം റാങ്ക്.
58 മാർക്കിന്റെ ചോദ്യങ്ങൾ മൂല്യനിർണയം നടത്താതെ ഒഴിവാക്കിയത് വിവാദമായതിനു പിന്നാലെയാണ്
പുനർമൂല്യനിർണയവും അഭിമുഖവും നടത്തി പുതിയ റാങ്ക് ലിസ്റ്റ് തയാറാക്കിയത്.
ഒരൊഴിവ് മാത്രമുള്ള തസ്തികയിലേക്കു മുൻപ് നടന്ന പരീക്ഷയിൽ ഒന്നാം റാങ്ക് നേടി നിയമിതനായ അരുൺ ജെ.പ്രതാപിന്
പുതിയ റാങ്ക് പട്ടികയിൽ അഞ്ചാം റാങ്ക് മാത്രമാണുള്ളത്. ശ്യാം കൃഷ്ണന് 78.50 മാർക്കും അരുണിന് 64.25 മാർക്കുമാണ് ലഭിച്ചിരിക്കുന്നത്.
ശ്യാമിനു പരീക്ഷയിൽ 59.50 മാർക്കും അഭിമുഖത്തിൽ 19 മാർക്കും ലഭിച്ചു. അരുണിന് ഇത് യഥാക്രമം 46.25, 18 എന്നിങ്ങനെയാണ്.
ആദ്യ റാങ്ക് പട്ടികയിൽ മൂന്നാം റാങ്കായിരുന്നു ശ്യാം കൃഷ്ണന്.
നിലവിൽ ഒന്നാം റാങ്ക് ലഭിച്ച അരുൺ ജെ. പ്രതാപ് ഒരു വർഷത്തിലേറെയായി ഈ തസ്തികയിൽ ജോലി ചെയ്യുകയാണ്.
നിയമന ശുപാർശ നൽകി ഒരു വർഷം വരെയേ പിഎസ്‌സിക്ക് അത് റദ്ദാക്കാൻ അധികാരമുള്ളൂ.
അതിനു ശേഷം ഏതെങ്കിലും തരത്തിലുള്ള നടപടി വേണമെങ്കിൽ പിഎസ്‌സിക്ക് സർക്കാരിനോടു ശുപാർശ ചെയ്യാം.
തുടർന്ന് നടപടി എടുക്കേണ്ടത് സർക്കാരിന്റെ ഉത്തരവാദിത്തമാകും.
