ഡൽഹി : ഐഐടി ഖരഗ്പൂരിലെ അസിസ്റ്റന്റ് പ്രൊഫസറെ ക്യാമ്പസിലെ ക്വാർട്ടേഴ്സിൽ മരിച്ച നിലയിൽ കണ്ടെത്തി. ഇലക്ട്രിക്കൽ എഞ്ചിനീയറിങ് വിഭാഗം അസിസ്റ്റന്റ് പ്രൊഫസറും ഹൈദരാബാദ് സ്വദേശിയുമായ 36കാരനായ ദീപക് റെഡ്ഡി പുള്ളഗുരം ആണ് മരിച്ചത്. ബുധനാഴ്ചയാരിരുന്നു സംഭവം.
ക്യാമ്പസിലെ സ്റ്റാഫ് ക്വാർട്ടേഴ്സിലെ മുറിയിൽ ഫാനിൽ തൂങ്ങിമരിച്ച നിലയിൽ സെക്യൂരിറ്റി ജീവനക്കാരാണ് ദീപക് റെഡ്ഡിയെ കണ്ടെത്തിയത്. ഉടൻ തന്നെ ഐഐടി ക്യാമ്പസിലെ ബിസി റോയ് ആശുപത്രിയിൽ എത്തിച്ചെങ്കിലും മരണം സ്ഥിരീകരിക്കുകയായിരുന്നു. നിലവിൽ മൃതദേഹം പോസ്റ്റ്മോർട്ടത്തിനായി അയച്ചു.
2022ലാണ് അദ്ദേഹം ഐഐടി ഖരഗ്പൂരിൽ ജോയിൻ ചെയ്യുന്നത്. ജെഎൻടിയു ഹൈദരാബാദിൽ നിന്ന് ബിടെകും എൽഐടി വരംഗലിൽ നിന്ന് എംടെകും പൂർത്തിയാക്കിയ അദ്ദേഹം ഐഐടി ഡൽഹിയിൽ നിന്നാണ് പിഎച്ച്ഡി നേടിയത്. ഇതിനുമുമ്പ് എൻഐടി വരംഗലിലും യുഎസിലെ യൂണിവേഴ്സിറ്റി ഓഫ് ടെക്സസ് ആർലിംഗ്ടണിലും പ്രവർത്തിച്ചിട്ടുണ്ട്. പൊലീസ് അസ്വാഭാവിക മരണത്തിന് കേസെടുത്തിട്ടുണ്ട്.
