തിരുവനന്തപുരം : സംസ്ഥാനത്ത് കെഎസ്ആർടിസിയുടെ പ്രിയദർശിനി സർവീസിനായി ഉപയോഗിക്കുന്ന ബസുകളുടെ നിറം ഇനി മുതല്‍ ഒറ്റ നിറമാക്കാൻ ഗതാഗത വകുപ്പ്. പ്രിയദർശിനി ബസുകള്‍ ജനങ്ങള്‍ക്ക് പെട്ടെന്ന് തിരിച്ചറിയാനും ഇത് സഹായിക്കും. നിലവില്‍ ബസില്‍ പ്രിയദർശിനി സർവീസിന്റെ സ്റ്റിക്കർ മാത്രമാണ് ഒട്ടിച്ചിരിക്കുന്നത്.
വെള്ള ഓർഡിനറി ബസ്സുകള്‍ ജനങ്ങള്‍ക്ക് പെട്ടെന്ന് തിരിച്ചറിയാൻ സാധിക്കുമെങ്കിലും പരമ്പരാഗത ചുവപ്പ് നിറത്തിലുള്ള ബസ്സുകള്‍ എളുപ്പത്തില്‍ പ്രായമായ യാത്രക്കാർക്ക് തിരിച്ചറിയണമെന്നില്ല. ഇതെല്ലാം മുന്നില്‍കണ്ടാണ് പുതിയ തീരുമാനം.
ഇതിനൊപ്പം ബസുകളുടെ ശുചീകരണം കൂടുതല്‍ കാര്യക്ഷമമാക്കാനും ഗതാഗത വകുപ്പ് പദ്ധതിയിടുന്നുണ്ട്. എംഎൽഎ ഫണ്ട് ഉപയോഗിച്ച്‌ പുതിയ ബസുകള്‍ വാങ്ങാൻ അനുമതി നല്‍കിയത് കെഎസ്ആർടിസിക്ക് ഏറെ ഗുണകരമാകുമെന്നാണ് വകുപ്പിൻ്റെ വിലയിരുത്തല്‍. ഇത്തരത്തില്‍ വാങ്ങുന്ന ബസുകള്‍ അതത് എംഎൽഎമാർ നിർദേശിക്കുന്ന റൂട്ടുകളിലായിരിക്കും സർവീസ് നടത്തുക. എംഎല്‍എ ഫണ്ടില്‍ നിന്നും ബസ് വാങ്ങാൻ ഉള്ള നിയമ തടസം കഴിഞ്ഞ ദിവസം നീക്കിയിരുന്നു.
