കൊച്ചി: ജില്ലയില്‍ ബസ് അപകടങ്ങള്‍ നിരന്തരമായി വർധിച്ചുവരുന്ന പശ്ചാത്തലത്തില്‍ ബസ് ഡ്രൈവർമാരുടെ മരണപ്പാച്ചിലിനെതിരെ കടുത്ത വിമർശനവുമായി ഹൈക്കോടതി.
കഴിഞ്ഞ ദിവസം കാക്കനാട് ബസിടിച്ച്‌ യുവതി മരിച്ച ദാരുണമായ സംഭവം പരാമർശിച്ചുകൊണ്ടായിരുന്നു കോടതിയുടെ വികാരഭരിതമായ ഇടപെടല്‍.
അപകടത്തിൻ്റെ സിസിടിവി ദൃശ്യങ്ങള്‍ മനസ്സിനെ വല്ലാതെ ഉലയ്ക്കുന്നതാണെന്നും രണ്ടാമതൊന്നു കാണാൻ പോലും സാധിക്കില്ലെന്നും കോടതി ചൂണ്ടിക്കാട്ടി.
"ഡ്രൈവർമാർ 'മാനിയാക്' (ഭ്രാന്തൻ) അവസ്ഥയില്‍ ബസ് ഓടിക്കുമ്പോള്‍ സാധാരണക്കാരായ പൗരന്മാർ എന്തുചെയ്യണം?" എന്ന് കോടതി രൂക്ഷമായി ചോദിച്ചു.
ഇത് ഒന്നോ രണ്ടോ തവണയല്ല, നിരന്തരമായി ഉയർന്നുവരുന്ന ഗുരുതരമായ പരാതിയാണെന്ന് കോടതി ഓർമിപ്പിച്ചു. റോഡുകളില്‍ കാല്‍നടയാത്രക്കാർക്ക് സുരക്ഷിതമായി നടക്കാൻ ഫുട്പാത്തുകള്‍ ഇല്ലാത്തതും അപകടസാധ്യത ഇരട്ടിയാക്കുന്നുണ്ടെന്ന് കോടതി വിലയിരുത്തി.
ഇടതുവശത്തുകൂടിയുള്ള അപകടകരമായ ഓവർടേക്കിങ്ങും അമിതവേഗതയുമാണ് അപകടങ്ങള്‍ക്ക് പ്രധാന കാരണമായി ചൂണ്ടിക്കാണിക്കപ്പെടുന്നത്. ഇത്തരം രീതിയില്‍ നിയമലംഘനം നടത്തി അശ്രദ്ധമായി വാഹനമോടിക്കുന്നവരൊന്നും ഡ്രൈവിങ്ങിന് യോഗ്യരല്ലെന്ന് കോടതി വ്യക്തമാക്കി.
അപകടമുണ്ടാക്കുന്ന കുറ്റക്കാരായ ഡ്രൈവർമാരുടെ ലൈസൻസ് നിശ്ചിത കാലത്തേക്ക് റദ്ദാക്കണമെന്നും, നിയമം ലംഘിക്കുന്നവർക്കെതിരെ വിട്ടുവീഴ്ചയില്ലാത്ത കർശന നടപടികള്‍ സ്വീകരിക്കണമെന്നും ഹൈക്കോടതി അധികൃതർക്ക് നിർദ്ദേശം നല്‍കി.
