തിരുവനന്തപുരം: അരുവിക്കരയില്‍ കുടിവെള്ളം ചോദിച്ച്‌ വീട്ടിലെത്തിയ യുവാക്കള്‍ വീട്ടമ്മയുടെ കഴുത്തില്‍ക്കിടന്ന രണ്ടരപ്പവൻ സ്വർണമാല പൊട്ടിച്ചെടുത്ത് കടന്നുകളഞ്ഞ കേസില്‍ മൂന്നുപേരെ അരുവിക്കര പൊലീസ് അറസ്റ്റ് ചെയ്തു.
മൈലം പറമ്പിൻതല തോപ്പില്‍വീട്ടില്‍ നിരഞ്ജൻ(20), വിനയ് രഞ്ജൻ(18), മൈലം ബൈജു ഭവനില്‍ കിരണ്‍ രാജ് (22) എന്നിവരാണ് പിടിയിലായത്.
മൈലം സ്വദേശിനി സുശീലയുടെ മാലയാണ് കവർന്നത്. ഭക്ഷണം കഴിച്ചുകൊണ്ടിരിക്കുകയായിരുന്ന സുശീലയോട് കുടിവെള്ളം ആവശ്യപ്പെട്ടാണ് വിനയ് രഞ്ജൻ വീട്ടിലെത്തിയത്.
പിന്നാലെ നിരഞ്ജനും അവിടെയെത്തി. തുടർന്ന് ഇരുവരും ചേർന്ന് സുശീലയുടെ കഴുത്തില്‍ക്കിടന്ന മാല പൊട്ടിച്ചെടുത്ത് കടന്നുകളയുകയായിരുന്നുവെന്നാണ് പൊലീസ് പറയുന്നത്.
മോഷ്ടിച്ച സ്വർണമാല പിന്നീട് സുഹൃത്തായ കിരണ്‍ രാജിന് കൈമാറി. ഇയാള്‍ മാല കാട്ടാക്കടയിലെ ഒരു ധനകാര്യ സ്ഥാപനത്തില്‍ 2.66 ലക്ഷം രൂപയ്ക്ക് വിറ്റതായും പൊലീസ് അന്വേഷണത്തില്‍ കണ്ടെത്തി.
ലഭിച്ച പണം ഉപയോഗിച്ച്‌ ഇവർ ഐഫോണ്‍ വാങ്ങിയതായും പൊലീസ് അറിയിച്ചു.
പ്രദേശത്തെ സിസിടിവി ദൃശ്യങ്ങള്‍ കേന്ദ്രീകരിച്ച്‌ നടത്തിയ അന്വേഷണത്തിലാണ് മൂന്നുപേരെയും പിടികൂടിയത്.
