കോട്ടയം: പ്രവാസികളോടുള്ള സർക്കാർ അവഗണന അവസാനിപ്പിക്കണമെന്നും പ്രവാസി ക്ഷേമനിധിയിൽ അംഗങ്ങളായ അർഹരായവർക്ക് മുടങ്ങിക്കിടക്കുന്ന പെൻഷൻ അടിയന്തരമായി വിതരണം ചെയ്യണമെന്നും, ചികിത്സാ സഹായം അനുവദിക്കണമെന്നും ആവശ്യപ്പെട്ട് പ്രവാസി മലയാളി വെൽഫെയർ അസോസിയേഷന്റെ നേതൃത്വത്തിൽ കോട്ടയം ഹെഡ് പോസ്റ്റ് ഓഫീസിലേക്ക് മാർച്ചും ധർണയും സംഘടിപ്പിച്ചു.
ജില്ലാ വൈസ് പ്രസിഡന്റ് എബ്രഹാം പൊന്നൻ സ്വാഗതം പറഞ്ഞ പരിപാടി സംസ്ഥാന പ്രസിഡന്റ് ഐസക്ക് പ്ലാപ്പള്ളി ഉദ്ഘാടനം ചെയ്തു. പ്രവാസി ക്ഷേമ പദ്ധതികളിൽ കാലതാമസം ഒഴിവാക്കി ആനുകൂല്യങ്ങൾ സമയബന്ധിതമായി ലഭ്യമാക്കണമെന്ന് അദ്ദേഹം ആവശ്യപ്പെട്ടു.
ജില്ലാ സെക്രട്ടറി സജി മാത്യു, തോമസ് മാത്യു, മധു വാകത്താനം , പത്തനംതിട്ട ജില്ലാ പ്രസിഡന്റ് ജേക്കബ് മാത്യു എന്നിവർ സംസാരിച്ചു. വിവിധ ജില്ലകളിൽ നിന്നുള്ള പ്രവാസികളും കുടുംബാംഗങ്ങളും പ്രതിഷേധ മാർച്ചിലും ധർണയിലും പങ്കെടുത്തു.
പ്രവാസികളുടെ ക്ഷേമപദ്ധതികൾ കാര്യക്ഷമമായി നടപ്പാക്കുക, മുടങ്ങിക്കിടക്കുന്ന പെൻഷൻ വിതരണം വേഗത്തിലാക്കുക, ചികിത്സാ സഹായം ഉൾപ്പെടെയുള്ള ആനുകൂല്യങ്ങൾ ഉടൻ അനുവദിക്കുക എന്നീ ആവശ്യങ്ങൾ ഉന്നയിച്ചായിരുന്നു പ്രതിഷേധം. ബന്ധപ്പെട്ട അധികാരികൾ വിഷയത്തിൽ അടിയന്തര ഇടപെടൽ നടത്തണമെന്ന് സംഘടന ആവശ്യപ്പെട്ടു.
