കണ്ണൂർ: കണ്ണൂർ ജില്ലാ പഞ്ചായത്ത് മുൻ പ്രസിഡന്‍റും സിപിഎം നേതാവുമായ പി പി ദിവ്യക്കെതിരായ പരാതി പിൻവലിക്കാൻ പണം ആവശ്യപ്പെട്ടെന്ന ആരോപണത്തില്‍ നിയമ നടപടിയുമായി കെഎസ്‍യു നേതാവ് മുഹമ്മദ് ഷമ്മാസ്.
കാർട്ടണ്‍ ഇന്ത്യ കമ്പനി എംഡി മുഹമ്മദ് ആസിഫിന് വക്കീല്‍ നോട്ടീസ് അയച്ചു. 7 കോടി രൂപ നഷ്ട പരിഹാരം വേണമെന്ന് ആവശ്യപ്പെട്ട് വക്കീല്‍ നോട്ടീസ്.
മുഹമ്മദ് ആസിഫ് ആരോപണം പിൻവലിച്ച്‌ മാപ്പ് പറയണമെന്നും മുഹമ്മദ് ഷമ്മാസ് ആവശ്യപ്പെട്ടു. പി പി ദിവ്യക്കെതിരായ പരാതി പിൻവലിക്കാൻ 5 ലക്ഷം രൂപ ഷമ്മാസ് ആവശ്യപ്പെട്ടെന്നായിരുന്നു ആസിഫിൻ്റെ ആരോപണം.
ദിവ്യയുടെ ബെനാമി സ്ഥാപനമെന്ന ആരോപണം നേരിടുന്ന കമ്പനിയാണ് കാർട്ടണ്‍. പി പി ദിവ്യ കണ്ണൂർ ജില്ലാ പഞ്ചായത്ത് പ്രസിഡന്റായിരിക്കെ കാർട്ടണ്‍ ഇന്ത്യ കമ്പനിക്ക് ടെൻഡർ ഇല്ലാതെ കരാറുകള്‍ നല്‍കിയെന്ന പരാതിയില്‍ കഴിഞ്ഞ ദിവസം വിജിലൻസ് അന്വേഷണത്തിന് ആഭ്യന്തരവകുപ്പ് ഉത്തരവിട്ടിരുന്നു.
മുഹമ്മദ് ഷമ്മാസായിരുന്നു പരാതിക്കാരൻ. പി പി ദിവ്യ കണ്ണൂരില്‍ അനധികൃതമായി ഭൂമി സമ്പാദിച്ചെന്നും ആരോപണം. എല്‍ഡിഎഫ് സർക്കാരിന്‍റെ കാലത്ത് നല്‍കിയ പരാതി, കഴമ്പില്ലെന്ന് കാട്ടി തളേളിയിരുന്നു. അതിലാണ് സർക്കാർ മാറിയപ്പോള്‍ അന്വേഷണത്തിന് ഉത്തരവായത്.
ദിവ്യയുടെയും ഭർത്താവിന്‍റെയും സ്വത്തുക്കള്‍ സംബന്ധിച്ചും അന്വേഷിക്കും. അതിനിടെ, ദിവ്യയുടെ ബെനാമി സ്ഥാപനമെന്ന ആരോപണം നേരിടുന്ന കാർട്ടണ്‍ ഇന്ത്യ അലയൻസ് കമ്പനിയുടെ എംഡി, ദിവ്യയുടെ ബന്ധുക്കള്‍ക്കും സിപിഎം നേതാക്കള്‍ക്കും പണം നല്‍കിയെന്ന പേരില്‍ ശബ്ദസന്ദേശങ്ങളും സ്ക്രീൻഷോട്ടുകളും പുറത്ത് വന്നു.
