തിരുവനന്തപുരം: സംസ്ഥാനത്ത് ജനജീവിതം ദുസ്സഹമാക്കി തുടരുന്ന രൂക്ഷമായ വൈദ്യുതി നിയന്ത്രണത്തില് സര്ക്കാരിനെതിരെ വിമര്ശനവുമായി ഡോ. ജോണ് ബ്രിട്ടാസ് എം.പി.
പവര്കട്ടില് കേരളത്തിലെ ജനങ്ങള് വലയുകയാണെന്നും വൈദ്യുതി നിയന്ത്രണം പരിഹരിക്കുന്നതില് നിലവിലെ ഭരണനേതൃത്വം പൂര്ണമായും പരാജയപ്പെട്ടുവെന്നും ബ്രിട്ടാസ് ഫേസ്ബുക്കില് പങ്കുവെച്ച വീഡിയോ സന്ദേശത്തിലൂടെ കുറ്റപ്പെടുത്തി.
എപ്പോഴാണ് കറണ്ട് പോകുന്നതെന്നോ എത്ര സമയത്തേക്കാണ് ലോഡ്ഷെഡ്ഡിങ് എന്നോ ജനങ്ങള്ക്ക് വ്യക്തതയില്ലെന്നും, കാര്യങ്ങള് സര്ക്കാര് രഹസ്യമാക്കി വെച്ചിരിക്കുകയാണെന്നും അദ്ദേഹം വിമര്ശിച്ചു.
'ഭരണനേതൃത്വം അക്ഷരാര്ത്ഥത്തില് പരാജയപ്പെടുമ്പോഴാണ് ഉദ്യോഗസ്ഥ നേതൃത്വം മുന്നോട്ടുവരുന്നത്. ഒരു ജനാധിപത്യ സംവിധാനത്തില് മന്ത്രിമാരും മുഖ്യമന്ത്രിയും അടക്കമുള്ള ജനപ്രതിനിധികളാണ് ഇത്തരം പ്രതിസന്ധി ഘട്ടങ്ങളില് ജനങ്ങളെ നേരിട്ട് അഭിമുഖീകരിക്കേണ്ടത്. നമ്മുടേത് ജനാധിപത്യ സംവിധാനമാണെന്നും അല്ലാതെ ബ്യൂറോക്രസിയല്ലെന്നുമുള്ള കാര്യം മുഖ്യമന്ത്രി വി.ഡി. സതീശന് ചിന്തിക്കേണ്ടതുണ്ട്,' എന്ന് ബ്രിട്ടാസ് പറഞ്ഞു.
ഇപ്പോഴത്തെ പ്രതിസന്ധിക്ക് കാരണം മുന് പിണറായി സര്ക്കാരാണെന്ന യു.ഡി.എഫ് സര്ക്കാരിന്റെ വാദം തെറ്റാണെന്ന് അദ്ദേഹം ചൂണ്ടിക്കാട്ടി. യു.ഡി.എഫ് സര്ക്കാര് അധികാരത്തില് വന്നത് മുതല് വൈദ്യുതി പ്രതിസന്ധിയെക്കുറിച്ച് നിരന്തരം മുന്നറിയിപ്പുകള് ലഭിച്ചിരുന്നതാണ്. കര്ണാടകയില് നിന്ന് വൈദ്യുതി വാങ്ങുന്നതടക്കമുള്ള നിര്ദ്ദേശങ്ങള് മുന്നിലുണ്ടായിരുന്നിട്ടും ധാരണയുണ്ടാക്കാന് സര്ക്കാര് താല്പര്യം കാണിച്ചില്ല. അധികാരത്തിലെത്തി മാസങ്ങള് കഴിഞ്ഞിട്ടും കൃത്യമായ കൂടിയാലോചനകള് നടത്താതെ വരുത്തിവെച്ച കൃത്രിമ പ്രതിസന്ധിയാണിതെന്നും ബ്രിട്ടാസ് ആരോപിച്ചു.
കേരളത്തിന്റെ ചരിത്രത്തില് വൈദ്യുതി രംഗത്ത് വിപ്ലവകരമായ മാറ്റങ്ങള് വരുത്താന് ശ്രമിച്ച വ്യക്തിയാണ് മുന് മുഖ്യമന്ത്രി പിണറായി വിജയനെന്ന് വ്യക്തമാക്കിയ ബ്രിട്ടാസ്, ജനങ്ങള് വലിയ ഭൂരിപക്ഷം തന്ന് അധികാരത്തിലേറ്റിയ യു.ഡി.എഫ് ജനങ്ങളോട് നന്ദികേട് കാണിക്കരുതെന്നും ഓര്മ്മിപ്പിച്ചു.
