മലപ്പുറം: പൊന്നാനി പീഡനക്കേസിൽ പ്രതികളായ മൂന്ന് പൊലീസ് ഉദ്യോഗസ്ഥരുടെ പേരുകൾ രേഖപ്പെടുത്താതെ പൊലീസ് എഫ്ഐആർ രജിസ്റ്റർ ചെയ്തതായി വിവരം. പൊന്നാനി പൊലീസാണ് കേസിൽ എഫ്ഐആർ രജിസ്റ്റർ ചെയ്തത്.
ഒരേ പരാതിയുടെ അടിസ്ഥാനത്തിൽ മൂന്ന് എഫ്ഐആറുകളാണ് രജിസ്റ്റർ ചെയ്തിരിക്കുന്നത്. കേസിൽ ആരോപണവിധേയരായ വിനോദ് വലിയാറ്റൂർ, വി.വി. ബെന്നി, സുജിത് ദാസ് എന്നിവരുടെ പേരുകൾക്ക് പകരം ഇവർ നേരത്തെ വഹിച്ചിരുന്ന പദവികൾ മാത്രമാണ് എഫ്ഐആറിൽ രേഖപ്പെടുത്തിയിരിക്കുന്നത്. മുൻ സിഐ, മുൻ ഡിവൈഎസ്പി, മുൻ എസ്പി എന്നിങ്ങനെയാണ് പരാമർശം.
അതേസമയം, പരാതിക്കാരിയുടെ പേര് എഫ്ഐആറിൽ ഉൾപ്പെടുത്തിയിട്ടുണ്ട്. ആരോപണവിധേയരായ പൊലീസ് ഉദ്യോഗസ്ഥരുടെ സ്ഥിരം മേൽവിലാസമായി അവരുടെ ഓഫീസ് വിലാസമാണ് രേഖപ്പെടുത്തിയിരിക്കുന്നതെന്നും വിവരമുണ്ട്.
