• പറ്റിക്കാൻ കൊള്ളാമെങ്കിലും ഇങ്ങനെ പറയരുത്; വാഹന പരിഷ്കരണത്തിൽ മുഖ്യമന്ത്രി വി.ഡി. സതീശനെ പരിഹസിച്ച് കെ.ബി. ഗണേഷ് കുമാർ!

തിരുവനന്തപുരം: നിയമസഭാ തെരഞ്ഞെടുപ്പ് വേളയിൽ മുഖ്യമന്ത്രി വി.ഡി. സതീശൻ നൽകിയ പ്രധാന വാഗ്ദാനങ്ങളിലൊന്നായ വാഹന പരിഷ്കരണത്തിനുള്ള അനുമതിയുമായി ബന്ധപ്പെട്ട് മോട്ടോർ വാഹന വകുപ്പ് പുറത്തിറക്കിയ പുതിയ സർക്കുലറിനെതിരെ കടുത്ത പരിഹാസവുമായി മുൻ ഗതാഗത മന്ത്രി കെ.ബി. ഗണേഷ് കുമാർ രംഗത്തെത്തി. മുഖ്യമന്ത്രിയുടെ വാഗ്ദാനം അനുസരിച്ച് വാഹന ഉടമകൾ പ്രതീക്ഷിച്ച രീതിയിലുള്ള പരിഷ്കരണങ്ങൾക്ക് മോട്ടോർ വാഹന വകുപ്പ് അനുമതി നൽകിയിരുന്നില്ല. ഇതുമായി ബന്ധപ്പെട്ട് വ്യവസ്ഥകളിൽ ചില വ്യക്തതകൾ വരുത്തിക്കൊണ്ട് മോട്ടോർ വാഹന വകുപ്പ് പുറത്തിറക്കിയ പുതിയ സർക്കുലർ ഇതിനോടകം തന്നെ വലിയ വിമർശനങ്ങൾക്കും ജനരോഷത്തിനും വഴി വെച്ചിരുന്നു. ഇതിന് പിന്നാലെയാണ് സാമൂഹിക മാധ്യമമായ ഫെയ്‌സ്ബുക്കിലൂടെ മുഖ്യമന്ത്രി വി.ഡി. സതീശനെ കടുത്ത ഭാഷയിൽ പരിഹസിച്ച് കെ.ബി. ഗണേഷ് കുമാർ കുറിപ്പ് പങ്കുവെച്ചത്. പറ്റിക്കാൻ കൊള്ളാവുന്ന ആളാണെങ്കിലും ഇങ്ങനെയൊന്നും ജനങ്ങളോട് പറയരുതായിരുന്നു എന്നും, ഇത് നടക്കില്ലെന്ന് താൻ അന്നേ പറഞ്ഞിരുന്നുവെന്നും ഗണേഷ് കുമാർ തന്റെ കുറിപ്പിൽ വ്യക്തമാക്കി. കേന്ദ്ര മോട്ടോർ വാഹന നിയമത്തിൽ പറയുന്ന കാര്യങ്ങൾ ഒരു സംസ്ഥാനത്തിന് മാത്രമായി തിരുത്താൻ കഴിയില്ലെന്നിരിക്കെ, കോടതിയെയും കേന്ദ്ര നിയമങ്ങളെയും മറികടന്ന് സംസ്ഥാന സർക്കാരിന് മാത്രമായി എങ്ങനെ വാഹന പരിഷ്കരണങ്ങൾ നടത്താൻ സാധിക്കുമെന്നും അദ്ദേഹം ചോദ്യമുന്നയിച്ചു. അതേസമയം വാഹന പരിഷ്കരണവുമായി ബന്ധപ്പെട്ട് മോട്ടോർ വാഹന വകുപ്പ് പുറത്തിറക്കിയ സർക്കുലറിൽ പലതും നിലവിലുള്ള മാനദണ്ഡങ്ങൾക്ക് വിധേയമായി ചെയ്യാവുന്നതാണെന്നാണ് വ്യക്തമാക്കുന്നത്. പൊതുജനങ്ങളിൽ നിന്നും ലഭിച്ച അപേക്ഷകളുടെ അടിസ്ഥാനത്തിൽ ഇത്തരം രൂപമാറ്റങ്ങൾക്ക് അനുവാദം നൽകി എന്ന രീതിയിലാണ് ഗതാഗത കമ്മീഷണറേറ്റ് ഇത് അവതരിപ്പിച്ചത്. കേന്ദ്ര മോട്ടോർ വാഹന ചട്ടങ്ങൾ പ്രകാരം ഇന്ധനം മാറ്റൽ, എൻജിൻ മാറ്റൽ, അല്ലെങ്കിൽ ചേസിസ് മാറ്റൽ, ബോഡി ഘടന മാറ്റൽ തുടങ്ങിയ ഏത് മാറ്റങ്ങളും കേന്ദ്ര സർക്കാർ വിജ്ഞാപനം ചെയ്ത കൃത്യമായ മാനദണ്ഡങ്ങൾ പാലിച്ചു മാത്രമേ ചെയ്യാൻ പാടുള്ളൂ എന്നും സർക്കുലറിൽ പ്രത്യേകം പറയുന്നുണ്ട്.