എറണാകുളം: കോതമംഗലം മാർ അത്തനേഷ്യസ് കോളേജ് വിദ്യാത്ഥി ആയേഷിന്റെ മരണത്തിൽ ദുരൂഹത ആരോപിച്ച് ബന്ധുക്കൾ. പ്രണയനൈരാശ്യം കാരണം ആയേഷ് ആത്മഹത്യ ചെയ്തെന്ന് വരുത്തി തീർക്കാൻ കോളേജ് അധികൃതർ ശ്രമിക്കുന്നുവെന്നാണ് പരാതി.
അസുഖബാധിതനായിട്ടും വീട്ടിലേക്ക് വരാൻ കുട്ടിയെ അനുവദിച്ചില്ലെന്നും ആരോപണമുണ്ട്.
കോതമംഗലം എം.എ. കോളേജിലെ രണ്ടാംവർഷ എൻജിനീയറിങ് വിദ്യാർഥിയായ ആയേഷിനെ ഇന്നലെ വൈകുന്നേരമാണ് ഹോസ്റ്റൽ കെട്ടിടത്തിൽനിന്ന് വീണ് മരിച്ച നിലയിൽ കണ്ടെത്തിയത്. കോളേജിൽനിന്ന് മടങ്ങിയെത്തിയ ആയേഷ് മുറിയിൽ ബാഗ് വെച്ചശേഷം പുറത്തേക്ക് പോയിരുന്നു. ഇതിന് പിന്നാലെയാണ് കെട്ടിടത്തിന് സമീപം വീണുകിടക്കുന്ന നിലയിൽ വിദ്യാർഥിയെ കണ്ടെത്തിയത്. ആയേഷ് പ്രണയനൈരാശ്യം നേരിട്ടിരുന്നുവെന്ന തരത്തിലുള്ള വിവരങ്ങളും സംഭവത്തിന് പിന്നാലെ പുറത്തുവന്നിരുന്നു.
എന്നാൽ, ആയേഷിന് പ്രണയബന്ധമോ അതുമായി ബന്ധപ്പെട്ട മാനസിക വിഷമങ്ങളോ ഉണ്ടായിരുന്നതായി അറിയില്ലെന്നാണ് ബന്ധുക്കൾ പറയുന്നത്. ഇത്തരമൊരു കാര്യം അടുത്ത ബന്ധുക്കളോടോ സുഹൃത്തുക്കളോടോ ആയേഷ് പങ്കുവെച്ചിട്ടില്ലെന്നും അവർ വ്യക്തമാക്കുന്നു. മരണത്തെ വ്യക്തിപരമായ പ്രശ്നങ്ങളുമായി ബന്ധപ്പെടുത്തി ആത്മഹത്യയായി ചിത്രീകരിക്കാൻ കോളേജ് അധികൃതർ ശ്രമിക്കുന്നുവെന്നാണ് ബന്ധുക്കളുടെ ആരോപണം.
കോളേജിൽ സമ്മർദം നേരിടുന്നുണ്ടെന്ന് ആയേഷ് അമ്മയോട് പറഞ്ഞിരുന്നതായും ബന്ധുക്കൾ വെളിപ്പെടുത്തി. വിദ്യാർഥിയുടെ മരണവിവരം കുടുംബത്തെ അറിയിക്കുന്നതിൽ വൈകിയെന്നും പരാതിയുണ്ട്. ആയേഷുമായി അടുത്ത ബന്ധം പുലർത്തിയിരുന്ന കോളേജിലെയും ഹോസ്റ്റലിലെയും വിദ്യാർഥികൾക്ക് കുട്ടി ഏതെങ്കിലും തരത്തിലുള്ള ബുദ്ധിമുട്ട് നേരിട്ടിരുന്നതായി വ്യക്തമായ അറിവില്ലെന്നാണ് വിവരം. തിരുവനന്തപുരം കല്ലറ സ്വദേശിയായ ആയേഷിന് 19 വയസായിരുന്നു.
