പാലക്കാട്: ഡല്‍ഹി പ്രതിഷേധവുമായി ബന്ധപ്പെട്ട പാലക്കാട് റെയില്‍വേ സ്റ്റേഷൻ മാർച്ചിനിടെ മദ്യപിച്ചുവന്ന ഒരു പൊലീസ് ഉദ്യോഗസ്ഥൻ ഇടിവള ഉപയോഗിച്ച്‌ മർദിച്ചുവെന്ന് എസ്‌എഫ്‌ഐ.
എസ്‌എഫ്‌ഐ സംസ്ഥാന സെക്രട്ടേറിയറ്റ് അംഗം വിപിൻ ആണ് ആരോപണമുന്നയിച്ചത്. പൊലീസുകാരൻ പച്ചക്ക് തെറി വിളിച്ചുവെന്നും വിപിൻ ആരോപിച്ചു. തങ്ങള്‍ പരാതി പറഞ്ഞപ്പോള്‍ പെട്ടെന്ന് ആ പൊലീസുകാരനെ അവിടെനിന്ന് മാറ്റിയെന്നും എ ആർ ക്യാമ്പിലെ ഉദ്യോഗസ്ഥനാണ് അദ്ദേഹമെന്നും എസ്‌എഫ്‌ഐ പറഞ്ഞു. ഓപ്പറേഷൻ തൂഫാൻ ആദ്യം നടപ്പിലാക്കേണ്ടത് രമേശ് ചെന്നിത്തലയുടെ പോലീസ് സേനയിലാണ് എന്നും എസ്‌എഫ്‌ഐ വിമർശിച്ചു.
പിന്നാലെ സിപിഐഎം നേതാക്കളും പൊലീസിനെതിരെ രംഗത്തെത്തി. മുതിർന്ന നേതാവ് എൻ എൻ കൃഷ്ണദാസ് അടക്കമുള്ളവർ പാലക്കാട് ടൗണ്‍ നോർത്ത് പൊലീസ് സ്റ്റേഷനില്‍ എത്തി പ്രതിഷേധിച്ചു. പിന്നാലെ ഡിവൈഎഫ്‌ഐ നേതാക്കളും പൊലീസിനെതിരെ രംഗത്തെത്തി. മദ്യപിച്ചെത്തിയ പൊലീസുകാരനെതിരെ നടപടി എടുക്കണം എന്നാണ് നേതാക്കളുടെ ആവശ്യം.
പ്രതിഷേധക്കാർക്കെതിരെയുള്ള പൊലീസ് നടപടിക്കെതിരെ കേരളത്തിന്റെ പല ഭാഗങ്ങളിലും എസ്‌എഫ്‌ഐ പ്രതിഷേധം അരങ്ങേറുകയാണ്. കോട്ടയത്ത് ഡിവൈഎഫ്‌ഐ പ്രവർത്തകർ റോഡ് ഉപരോധിച്ചു. കോട്ടയം ഗാന്ധി സ്ക്വയറിനു മുൻപില്‍ ആണ് റോഡ് ഉപരോധം. പിന്നാലെ എംസി റോഡില്‍ വൻ ഗതാഗതക്കുരുക്ക് രൂപപ്പെട്ടു. പ്രതിഷേധം രൂക്ഷമായതോടെ പൊലീസ് പ്രവർത്തകർക്ക് നേരെ ലാത്തി വീശുകയും അറസ്റ്റ് ചെയ്ത് നീക്കുകയും ചെയ്തു.
