തിരുവനന്തപുരം: വർക്കലയില്‍ പതിനേഴുകാരൻ നേരിട്ടത് അതിക്രൂര മർദ്ദനം. പൊലീസ് വാഹനത്തില്‍ ആളൊഴിഞ്ഞ പ്രദേശത്ത് എത്തിച്ച്‌ മർദിച്ചെന്നും, ബൂട്ടുകൊണ്ട് കാല് ചവിട്ടി ഒടിച്ചെന്നുമാണ് പതിനേഴുകാരന്റെ വെളിപ്പെടുത്തല്‍.
മറ്റൊരു കേസിലെ പ്രതിയെ അന്വേഷിച്ചെത്തിയ വർക്കല പൊലീസ്, പ്രതിയെ സഹായിക്കുന്നു എന്ന സംശയത്തിന്റെ പേരില്‍ 17കാരനെ മർദിച്ചെന്നാണ് പരാതി. മറ്റൊരാള്‍ ചെയ്‌ത കുറ്റത്തിന് എന്തിനു തന്റെ മകനെ വേട്ടയാടുന്നെന്ന് പതിനേഴുകാരന്റെ അമ്മ ചോദിച്ചു.
മർദ്ദന വിവരം പുറത്ത് പറഞ്ഞാല്‍ കുടുംബത്തെ കള്ള കേസില്‍ കുടുക്കുമെന്ന് പൊലീസ് ഭീഷണിപ്പെടുത്തിയെന്ന് 17കാരൻ പറഞ്ഞു. ജീപ്പില്‍ വെച്ച്‌ എസ്‌ഐ മുഖത്തടിച്ചെന്നും സ്റ്റേഷനിലെത്തിയപ്പോള്‍ രക്തം ഛർദിച്ചെന്നും 17കാരൻ പറഞ്ഞു. വിഷയത്തില്‍ പ്രതിഷേധവുമായി പ്രതിപക്ഷ യുവജന സംഘടനകളും രംഗത്തെത്തി. എന്നാല്‍ പതിനേഴുകാരനെ മർദിച്ചിട്ടില്ലെന്നാണ് വർക്കല പൊലീസിന്റെ വിശദീകരണം.
അടിപിടി കേസുമായി ബന്ധപ്പെട്ട് പൊലീസ് അന്വേഷിച്ചെത്തിയ പ്രതിയുമായി 17കാരൻ ഫോണില്‍ ബന്ധപ്പെട്ടെന്ന സംശയത്തിലായിരുന്നു മർദ്ദനം എന്നാണ് പരാതി. ശരീരമാകെ മർദനമേറ്റപാടുകളുണ്ട്. കാല് ഒടിഞ്ഞെന്നും കഴുത്തിന് പരുക്കുണ്ടെന്നും കുട്ടിയുടെ മാതാവ് പറഞ്ഞു. സംഭവത്തില്‍ വർക്കല എസ്.ഐ ഉള്‍പ്പെടെ നാല് പൊലീസുകാർക്കെതിരെ നടപടി ആവശ്യപ്പെട്ട് മാതാവ് ഡി.വൈ.എസ്.പിക്കും ബാലാവകാശ കമ്മീഷനും പരാതി നല്‍കി.
