മുണ്ടക്കയം: മുണ്ടക്കയം ബസ് സ്റ്റാൻഡിൽ പൊതുജനങ്ങളെയും യാത്രക്കാരെയും ഭീതിയിലാഴ്ത്തി യുവാക്കളുടെ അഴിഞ്ഞാട്ടം.
തടയാനെത്തിയ പോലീസുമായി യുവാക്കൾ മൽപ്പിടുത്തത്തിലേർപ്പെട്ടു. ഒടുവിൽ കൂടുതൽ പോലീസുകാരെത്തി ബലപ്രയോഗത്തിലൂടെ ഇവരെ കീഴടക്കി സ്റ്റേഷനിലേക്ക് മാറ്റി.
മുണ്ടക്കയം ബസ് സ്റ്റാൻഡിൽ വച്ചാണ് നാടകീയ സംഭവങ്ങൾ അരങ്ങേറിയത്. ബസ് കാത്തുനിന്ന യാത്രക്കാർക്കും വ്യാപാരികൾക്കും നേരെ യുവാക്കൾ ബഹളമുണ്ടാക്കുകയും ഭീഷണിയുയർത്തുകയും ചെയ്യുകയായിരുന്നു.
വിവരമറിഞ്ഞ് സ്ഥലത്തെത്തിയ ഡ്യൂട്ടിയിലുണ്ടായിരുന്ന പോലീസുകാർ ഇവരെ ശാന്തരാക്കാൻ ശ്രമിച്ചെങ്കിലും യുവാക്കൾ പോലീസിനു നേരെ തിരിയുകയായിരുന്നു.
തുടർന്ന് പോലീസുകാരും യുവാക്കളും തമ്മിൽ തെരുവിൽ കടുത്ത മൽപ്പിടുത്തമുണ്ടായി. ആൾക്കൂട്ടം തടിച്ചുകൂടിയതോടെ ബസ് സ്റ്റാൻഡ് പരിസരത്ത് ഏറെ നേരം ഭീതിയും സംഘർഷാവസ്ഥയും നിലനിന്നു.
സ്ഥിതിഗതികൾ കൈവിട്ടുപോകുന്ന അവസ്ഥ വന്നതോടെ മുണ്ടക്കയം പോലീസ് സ്റ്റേഷനിൽ നിന്ന് കൂടുതൽ സേന സ്ഥലത്തെത്തി. ബലപ്രയോഗത്തിലൂടെ ഏറെ പരിശ്രമിച്ചാണ് യുവാക്കളെ പോലീസ് കീഴടക്കിയത്. തുടർന്ന് ഇവരെ പോലീസ് വാഹനത്തിൽ സ്റ്റേഷനിലേക്ക് മാറ്റി.
