കോട്ടയം: വിൽപ്പനയ്ക്കായി കടത്തിക്കൊണ്ടുവന്ന 2.205 കിലോഗ്രാം ഉണക്ക കഞ്ചാവുമായി പശ്ചിമബംഗാൾ സ്വദേശി കാഞ്ഞിരപ്പള്ളിയിൽ അറസ്റ്റിൽ.
പശ്ചിമബംഗാൾ മുർഷിദാബാദ് സ്വദേശി ജാഹിദുൾ ഇസ്ലാം (22) ആണ് പിടിയിലായത്. ജില്ലാ പോലീസ് മേധാവിയുടെ ലഹരിവിരുദ്ധ സ്ക്വാഡ് (DANSAF), കാഞ്ഞിരപ്പള്ളി പോലീസ്, ഡിവൈഎസ്പിയുടെ തൂഫാൻ ടീം എന്നിവർ സംയുക്തമായാണ് പ്രതിയെ പിടികൂടിയത്.
ഇന്ന് (സെപ്റ്റംബർ 23) പുലർച്ചെ കാഞ്ഞിരപ്പള്ളി കുരിശുകവല ജംഗ്ഷന് സമീപം സംശയാസ്പദമായി ബാഗുമായി നിൽക്കുകയായിരുന്ന യുവാവിനെ പോലീസ് പരിശോധിക്കുകയായിരുന്നു. ബാഗിനുള്ളിൽ രണ്ട് പാക്കറ്റുകളിലായി സൂക്ഷിച്ചിരുന്ന കഞ്ചാവ് കണ്ടെത്തുകയായിരുന്നു.
മഴക്കാലത്ത് മോഷണ ശ്രമങ്ങൾ തടയുന്നതിനായി നടത്തിയ രാത്രികാല പട്രോളിംഗിനിടെയാണ് ഇയാൾ പോലീസിന്റെ ശ്രദ്ധയിൽപ്പെട്ടത്.
പ്രതിക്കെതിരെ നേരത്തെ ഈരാറ്റുപേട്ട പോലീസ് സ്റ്റേഷനിൽ എൻഡിപിഎസ് നിയമപ്രകാരം നാല് കേസുകൾ നിലവിലുണ്ട്. ഈരാറ്റുപേട്ടയിൽ താമസിച്ച് അന്യസംസ്ഥാന തൊഴിലാളികൾക്കിടയിൽ കഞ്ചാവ് വിൽപ്പന നടത്തിയിരുന്ന ഇയാൾ, പോലീസ് നിരീക്ഷണത്തിൽ നിന്ന് രക്ഷപ്പെടാനാണ് കാഞ്ഞിരപ്പള്ളിയിലേക്ക് താമസം മാറ്റിയത്.
ടൈൽ പണിക്കാരനാണെന്ന് പറയുമെങ്കിലും, കൃത്യമായ ഇടവേളകളിൽ നാട്ടിൽ പോയി തിരികെ വരുമ്പോൾ വലിയ അളവിൽ ലഹരി വസ്തുക്കൾ കൊണ്ടുവന്ന് വിൽപ്പന നടത്തുന്നതാണ് ഇയാളുടെ രീതിയെന്ന് പോലീസ് പറഞ്ഞു. ഇതേ തുടർന്നാണ് ജില്ലാ പോലീസ് മേധാവിയുടെ ലഹരിവിരുദ്ധ സ്ക്വാഡ് ഇയാളെ നിരീക്ഷിച്ചു വരുന്നത്.
കാഞ്ഞിരപ്പള്ളി പോലീസ് സ്റ്റേഷനിൽ എൻഡിപിഎസ് വകുപ്പ് പ്രകാരം കേസ് രജിസ്റ്റർ ചെയ്തു.
പരിശോധനയിൽ കാഞ്ഞിരപ്പള്ളി SHO വർഷ മധു, SI മഹേഷ് കെ.എൽ., SCPO രതീഷ്, ഡ്രൈവർ CPO അൻസാർ ഹംസ, ഡാൻസാഫ് ടീം അംഗങ്ങളായ ശ്രീരാജ് ജി. നായർ, വിമൽ, അനൂപ്, തൂഫാൻ സ്ക്വാഡ് അംഗങ്ങളായ സുജിത് എം.വി., ഷെമീർ, ബോബി, മഹേഷ് എന്നിവർ പങ്കെടുത്തു.
