കട്ടപ്പന: മദ്യലഹരിയിലെത്തി ഉപദ്രവിക്കാന്‍ ശ്രമിച്ച യുവാവിനെ ഓടിച്ചിട്ട് പിടികൂടി പൊലീസിനു കൈമാറി യുവതി. എറണാകുളം സ്വദേശി ജാക്‌സന്‍ (25) ആണ് പിടിയിലായത്.
ഇന്നലെ രാത്രി എട്ടോടെ കട്ടപ്പന നഗരത്തിലായിരുന്നു സംഭവം. കുടുംബത്തോടൊപ്പമെത്തിയ കുന്തളംപാറ സ്വദേശിനി വീണയാണ് മദ്യലഹരിയില്‍ ഉപദ്രവിക്കാന്‍ ശ്രമിച്ച യുവാവിനെ പിന്തുടര്‍ന്ന് പിടികൂടിയത്. കുടുംബത്തോടൊപ്പം എത്തിയ യുവതി മാര്‍ക്കറ്റ് ജംക്ഷനില്‍ എത്തിയപ്പോഴാണ് ജാക്‌സന്‍ ഉപദ്രവിക്കാന്‍ ശ്രമിച്ചത്.
യുവതി പ്രതികരിച്ചതോടെ ഇയാള്‍ ഓടി രക്ഷപ്പെടാന്‍ ശ്രമിച്ചു. എന്നാല്‍ യുവതി പിന്നാലെ ഓടി. പുതിയ ബസ് സ്റ്റാന്‍ഡ് വരെ പിന്‍തുടര്‍ന്നശേഷം വ്യാപാരികളുടെ സഹായത്തോടെ ഇയാളെ പിടികൂടുകയായിരുന്നു. ഇയാളെ പിന്നീട് പൊലീസിനു കൈമാറി.
