തിരുവനന്തപുരം: മാസപ്പടി കേസില്‍ മുൻ മുഖ്യമന്ത്രി പിണറായിയുടെ വീട്ടില്‍ സമൻസ് പതിപ്പിക്കലുമായി ബന്ധപ്പെട്ട് രാഷ്ട്രീയമായി എതിർപ്പ് ശക്തമാക്കാൻ സിപിഎം.
പിണറായിയെ അപമാനിക്കാനാണ് ഇതെന്ന നിലപാടിലാണ് പാർട്ടി. കേസില്‍ പിണറായി വെള്ളിയാഴ്ച്ച ഹാജരാകില്ല. സുപ്രീം കോടതി നിലപാട് കാക്കാനാണ് തീരുമാനം.
പിണറായിയുടെ ചോദ്യം ചെയ്യലിന് ഉന്നത ഉദ്യോഗസ്ഥരെ കൊണ്ടുവരാനാണ് ഇഡിയുടെ നീക്കം. ഇഡിയുടെ സ്പെഷ്യല്‍ ഡയറക്ടറക്കമുള്ള ഉന്നത ഉദ്യോഗസ്ഥർ ഡൽഹിയില്‍ നിന്ന് കൊച്ചിയില്‍ എത്തിയാകും ചോദ്യം ചെയ്യല്‍.
അതിവേഗത്തില്‍ അതീവ ശ്രദ്ധയോടെയാണ് ഇഡി കാര്യങ്ങള്‍ മുന്നോട്ട് കൊണ്ടുപോകുന്നത്. ഇതിന്‍റെ ഭാഗമായാണ് പിണറായിയുടെ വീട്ടില്‍ സമൻസ് പതിപ്പിച്ചത്.
തപാലില്‍ സമൻസ് ലഭിക്കുമെന്ന് പ്രതീക്ഷിച്ചിരിക്കുമ്പോഴാണ് നേരിട്ട് വീട്ടിലെത്തി നോട്ടീസ് പതിപ്പിച്ചത്. കൈപ്പറ്റിയില്ലെന്നും കിട്ടിയിട്ടില്ലെന്നും പറഞ്ഞ് ഒഴിയാതിരിക്കാനാണ് വീട്ടില്‍ സമൻസ് പതിപ്പിച്ചത്.
മ്യൂസിയം പൊലീസിനെ വിളിച്ചുവരുത്തിയാണ് നോട്ടീസ് ഒട്ടിച്ചത്. വീട്ടിലെ ചുമരില്‍ സമൻസ് പതിപ്പിച്ചതില്‍ അസ്വാഭാവികതയില്ലെന്നും ഇഡി ഉദ്യോഗസ്ഥർ വ്യക്തമാക്കി.
