കൊച്ചി: കൊച്ചിയില്‍ സിനിമ-വൈദ്യശാസ്ത്ര മേഖലകളെ ഒരുപോലെ ഞെട്ടിച്ചുകൊണ്ട് യുവനടിയുടെ ബന്ധുവിനെ ലൈംഗികമായി പീഡിപ്പിച്ച കേസില്‍ പ്രതിയായ പ്രമുഖ ഡോക്ടർ ഒളിവിലായതോടെ അന്വേഷണം വൻ വഴിത്തിരിവിലേക്ക്.
കേസില്‍ കുടുങ്ങിയതോടെ നാടുവിട്ട ആസ്റ്റർ മെഡിസിറ്റിയിലെ മുൻ റേഡിയോളജിസ്റ്റായ ഡോ. ജോണ്‍സണ്‍ കെ. വർഗീസിനായി (41) പോലീസ് ലുക്കൗട്ട് സർക്കുലർ പുറപ്പെടുവിച്ചു. പ്രതി വിദേശത്തേക്ക് കടക്കാനുള്ള സാധ്യത തടയാൻ എയർപോർട്ടുകളിലടക്കം ഇൻഫോപാർക്ക് പോലീസ് ജാഗ്രതാ നിർദ്ദേശം നല്‍കിയിരിക്കുകയാണ്. ഇയാളെ കണ്ടെത്താൻ ബന്ധുക്കളുടെ വിവരങ്ങളടക്കം ശേഖരിച്ച്‌ പോലീസ് തെരച്ചില്‍ ഊർജ്ജിതമാക്കിയിട്ടുണ്ട്.
അതേസമയം, കേസുമായി ബന്ധപ്പെട്ട് നടിയും സംഘവും ഡോക്ടറുടെ കയ്യില്‍ നിന്ന് പിടിച്ചെടുത്ത് പൊലീസിന് കൈമാറിയ മൊബൈല്‍ ഫോണുകളില്‍ നിന്നാണ് അതിരൂക്ഷമായ തെളിവുകള്‍ പുറത്തുവന്നത്. ഫോണ്‍ ശാസ്ത്രീയ പരിശോധനയ്ക്ക് വിധേയമാക്കിയപ്പോള്‍ ഇയാളുടെ അടുക്കല്‍ ചികിത്സ തേടിയെത്തിയ സ്ത്രീകളുടേത് ഉള്‍പ്പെടെ പന്ത്രണ്ടിലധികം പേരുടെ രഹസ്യ ദൃശ്യങ്ങളാണ് കണ്ടെടുത്തത്. ഈ ദൃശ്യങ്ങളില്‍ ഭൂരിഭാഗവും രോഗികളുടെയും അവരുടെ ബന്ധുക്കളുടെയുമാണെന്ന് അന്വേഷണത്തില്‍ വ്യക്തമായിട്ടുണ്ട്. ദൃശ്യങ്ങളില്‍ ഉള്‍പ്പെട്ട കൂടുതല്‍ സ്ത്രീകള്‍ പരാതിയുമായി മുന്നോട്ടുവന്നാല്‍ ഡോക്ടർക്കെതിരെ പീഡനത്തിനും ഐടി ആക്‌ട് പ്രകാരവും കൂടുതല്‍ കേസുകള്‍ രജിസ്റ്റർ ചെയ്യാനാണ് പോലീസിന്റെ നീക്കം. സംഭവം പുറത്തറിയുകയും പീഡന കേസ് രജിസ്റ്റർ ചെയ്യപ്പെടുകയും ചെയ്തതോടെ കൊച്ചി ആസ്റ്റർ മെഡിസിറ്റി മാനേജ്‌മെന്റ് ഇയാളെ ജോലിയില്‍ നിന്ന് ഉടനടി പിരിച്ചുവിട്ടിരുന്നു
ഡോക്ടറെ കൊച്ചിയിലെ ഫ്ലാറ്റിലേക്ക് വിളിച്ചുവരുത്തി ആക്രമിച്ചെന്ന കേസില്‍ മുൻപ് അറസ്റ്റിലായ നടി അതുല്യ ചന്ദ്രയുടെ ബന്ധുവായ അമ്പതുകാരി നല്‍കിയ പരാതിയിലാണ് ഡോക്ടർക്കെതിരെ ഇപ്പോള്‍ ബലാത്സംഗ കേസ് നിലനില്‍ക്കുന്നത്. തന്നെ മദ്യം നല്‍കി ബോധരഹിതയാക്കി പീഡിപ്പിക്കുകയും ദൃശ്യങ്ങള്‍ പകര്ത്തുകയും ചെയ്തുവെന്നാണ് സ്ത്രീയുടെ മൊഴി. ഇത്തരത്തില്‍ ഫോണില്‍ പകർത്തപ്പെട്ട ദൃശ്യങ്ങള്‍ നശിപ്പിച്ചു കളയാൻ വേണ്ടിയാണ് ഡോക്ടറെ സൂത്രത്തില്‍ ഫ്ലാറ്റിലേക്ക് വിളിച്ചുവരുത്തിയതെന്ന് നടി അടക്കമുള്ളവർ പോലീസിന് മൊഴി നല്‍കിയിട്ടുണ്ട്.
എന്നാല്‍, ഇതിനിടെ പണം ആവശ്യപ്പെട്ട് ഡോക്ടറെ തടഞ്ഞുവെച്ച്‌ ഭീഷണിപ്പെടുത്തുകയും മർദ്ദിക്കുകയും മൊബൈല്‍ ഫോണും സാധനങ്ങളും കവരുകയും ചെയ്തുവെന്നാരോപിച്ച്‌ ഡോക്ടർ നല്‍കിയ പരാതിയും നിലവിലുണ്ട്. ഈ കേസില്‍ അറസ്റ്റിലായ നടി അതുല്യ ചന്ദ്ര, നടൻ ബിബിൻ പെരുമ്പിള്ളി എന്നിവരുള്‍പ്പെടെയുള്ള മൂന്ന് പ്രതികളുടെയും ജാമ്യാപേക്ഷ കോടതി പൂർണ്ണമായും തള്ളി. പീഡനവും മർദ്ദനവും ബ്ലാക്ക് മെയിലിംഗും ഇടകലർന്ന ഈ കൊച്ചി പീഡന കേസില്‍ വരും ദിവസങ്ങളില്‍ കൂടുതല്‍ പ്രമുഖർ കുടുങ്ങുമെന്നാണ് വിവരങ്ങള്‍ സൂചിപ്പിക്കുന്നത്.
