ഓച്ചിറ: മുഹമ്മദ് നിയാസ് ജൗഹരി മോശമായി പെരുമാറിയെന്നാണ് യുവതി പറയുന്നത്. മോട്ടിവേഷൻ സ്പീക്കർ എന്ന നിലയിലാണ് പ്രതിയെ പരിചയപ്പെടുന്നതെന്നും നല്ല വ്യക്തിയായി അഭിനയിച്ച്‌ ഫോണ്‍ നമ്പർ വാങ്ങിയെന്നും യുവതി വെളിപ്പെടുത്തി.
നിങ്ങള്‍ക്ക് ചില പ്രശ്നങ്ങള്‍ ഉണ്ടെന്നും പരിഹരിക്കണമെന്നും മുഹമ്മദ് നിയാസ് ജൗഹരി യുവതിയോട് പറയുകയായിരുന്നു. ഫോണ്‍ സംഭാഷണത്തിനിടെ മോശമായി സംസാരിക്കുകയും വീഡിയോ കോള്‍ വിളിക്കാൻ പ്രതി നിർബന്ധിക്കുകയുമായിരുന്നു. പരോക്ഷമായി മോശം കാര്യങ്ങള്‍ പറയുന്നത് ആവർത്തിച്ചെന്നും സെക്സ് എന്ന വാക്ക് ഉപയോഗിച്ചെന്നും യുവതി പറയുന്നു. പുറത്തു വന്ന ഓഡിയോകളില്‍ പെരുമാറുന്നത് പോലെയാണ് മുഹമ്മദ് നിയാസ് ജൗഹരിയുടെ ഇടപെടലെന്നും സമാന അനുഭവം പലർക്കും ഉണ്ടായെന്നും പുറത്തു പറയാനുള്ള മടിയും ഭയവും കാരണം ആരും പറയില്ലെന്നും യുവതി പറഞ്ഞു.
കഴിഞ്ഞ ദിവസമാണ് 16 കാരിയോട് ലൈംഗികാതിക്രമം നടത്തിയെന്ന പരാതിയില്‍ മുഹമ്മദ് നിയാസ് ജൗഹരി അറസ്റ്റിലായത്. ഹബീബിയ്യ ഇസ്ലാമിക് അക്കാദമി എന്ന സ്ഥാപനത്തിന്റെ ഡയറക്ടറാണ് പ്രതി. ഇയാളുടെ സ്ഥാപനത്തില്‍ വെച്ചായിരുന്നു ആദ്യ ഉപദ്രവം. 65-കാരിയുടെ ആരോഗ്യപ്രശ്നങ്ങള്‍ പരിഹരിക്കാമെന്നും ബാധ ഒഴിപ്പിക്കാമെന്നും പറഞ്ഞാണ് പെണ്‍കുട്ടിയെയും അച്ചാമ്മയെയും ഓച്ചിറ മേമനയിലുള്ള അല്‍ ഹബീബിയ ഇസ്ലാമിക് അക്കാദമിയിലേക്ക് വരുത്തിയത്. തുടർന്ന് അക്കാദമിയില്‍ വെച്ചും പ്രതി വാടകയ്ക്ക് താമസിക്കുന്ന വീട്ടില്‍ വെച്ചും പെണ്‍കുട്ടിയെ പീഡനത്തിന് ഇരയാക്കുകയായിരുന്നു. 2025 ഒക്ടോബർ, നവംബർ മാസങ്ങളിലാണ് പീഡനം നടന്നത്. കുട്ടി സുഹൃത്തുക്കളോട് വിവരം വെളിപ്പെടുത്തിയതോടെയാണ് പൊലീസ് വിവരമറിയുകയും പെണ്‍കുട്ടിയുടെ മൊഴി രേഖപ്പെടുത്തി കേസ് രജിസ്റ്റർ ചെയ്യുകയും ചെയ്തത്.
