ഫരീദാബാദ്: കൊടുംക്രൂരത... 13 വയസ്സുകാരിയെ സുഹൃത്തിന്റെ മുന്നില്‍ വെച്ച്‌ കൂട്ടബലാത്സംഗം ചെയ്തെന്ന് പരാതി.
ഓഗസ്റ്റ് 24നാണ് ഞെട്ടിക്കുന്ന സംഭവം നടന്നത്. ഗ്രേറ്റർ ഫരീദാബാദ് പ്രദേശത്തുള്ള തകർന്ന കെട്ടിടത്തിനുള്ളില്‍ വെച്ചാണ് ഒരു സംഘം യുവാക്കള്‍ പെണ്‍കുട്ടിയെ കൂട്ടബലാത്സംഗം ചെയ്തത്.ഒരു മാസത്തോളം പെണ്‍കുട്ടി ഈ വിവരം മാതാപിതാക്കളില്‍ നിന്ന് മറച്ചുവെച്ചു. പെണ്‍കുട്ടി കടുത്ത മാനസിക അസ്വസ്ഥതകള്‍ പ്രകടിപ്പിക്കാൻ തുടങ്ങിയതോടെ വീട്ടുകാര്‍ കാര്യങ്ങള്‍ അന്വേഷിച്ചപ്പോഴാണ് പീഡന വിവരം പുറത്തറിയുന്നത്. പിന്നാലെ പെണ്‍കുട്ടിയുടെ മാതാപിതാക്കള്‍ പൊലീസില്‍ പരാതി നല്‍കി.
ട്യൂഷൻ ക്ലാസ് കഴിഞ്ഞ് മടങ്ങിവരികയായിരുന്ന പെണ്‍കുട്ടി 16 വയസ്സുള്ള ആണ്‍സുഹൃത്തിനൊപ്പം ഫരീദാബാദിലുള്ള കെട്ടിടത്തിനകത്തേക്ക് പോയിരുന്നുവെന്നാണ് പരാതിയില്‍ പറയുന്നത്. ഇത് കണ്ട യുവാക്കളുടെ സംഘം അവരെ പിന്തുടർന്നെന്നും അവിടെവെച്ച്‌ ഇരുവരെയും ഭീഷണിപ്പെടുത്തിയ ശേഷം ആണ്‍സുഹൃത്തിന്റെ മുന്നില്‍ വെച്ച്‌ പെണ്‍കുട്ടിയെ ബലാത്സംഗം ചെയ്തുവെന്നുമാണ് ആരോപണം.ആണ്‍സുഹൃത്തിനെയും പ്രതികള്‍ പീഡിപ്പിച്ചുവെന്നും ആരോപണമുണ്ടായിരുന്നു. എന്നാല്‍ ഇക്കാര്യം പൊലീസ് നിഷേധിച്ചു. സംഭവത്തില്‍ മൂന്നു പ്രതികളെ അറസ്റ്റ് ചെയ്തെന്നും അന്വേഷണം നടക്കുകയാണെന്നും പൊലീസ് അറിയിച്ചു.
