കണ്ണൂർ: അനസ്തീഷ്യ നല്‍കിയതിന് പിന്നാലെ പയ്യന്നൂരിലെ ഒന്നര വയസുകാരൻ ദേവാൻഷ് ശൗര്യ മരിച്ച സംഭവത്തില്‍ പയ്യന്നൂർ ബേബി മെമ്മോറിയല്‍ ആശുപത്രിയിലെ 3 ഡോക്‌ടർമാരെക്കൂടി പ്രതി ചേർത്തു.
ആശുപത്രി ആർ.എം.ഒ ഡോ. ഫ്രഡി ജോസഫ്, ഡോ. ആശ, ഡോ. ആരതി എന്നിവരെയാണ് പ്രതി ചേർത്തത്. മനപൂർവ്വമല്ലാത്ത നരഹത്യ വകുപ്പ് ചുമത്തിയാണ് കേസ്. ചികിത്സാ പിഴവുണ്ടായെന്ന സംസ്ഥാന തല വിദഗ്ധ സമിതിയുടെ റിപ്പോർട്ടിന്‍റെ അടിസ്ഥാനത്തിലാണ് നടപടി. കുട്ടിക്ക് അനസ്തീഷ്യ നല്‍കിയ ഡോ. അഞ്ജലിയെ നേരത്തെ പ്രതി ചേർത്തിരുന്നു.
ഇക്കഴിഞ്ഞ ജൂലൈ 10ന് ആണ് അനസ്തീഷ്യ നല്‍കിയതിന് പിന്നാലെ ബോധരഹിതനായ കുട്ടി മരിച്ചത്. ദേവാൻഷ് ശൗര്യ മരിച്ച സംഭവത്തില്‍ അന്വേഷണത്തില്‍ മെല്ലെപ്പോക്കെന്ന് കുടുംബം നേരത്തെ ആരോപിച്ചിരുന്നു. ആരോഗ്യമന്ത്രി കെ. മുരളീധരനനെ നേരില്‍ കണ്ട് പരാതിയും നല്‍കിയിരുന്നു. സംസ്ഥാനതല വിദഗ്ധ സമിതിയുടെ റിപ്പോർട്ട് കിട്ടാത്തതാണ് കൂടുതല്‍ ഡോക്‌ടർമാരെ പ്രതി ചേർക്കുന്നതില്‍ തടസമെന്നായിരുന്നു പയ്യന്നൂർ പൊലീസ് പറഞ്ഞിരുന്നത്.
