കൊച്ചി: തെരഞ്ഞെടുപ്പ് ഫണ്ട് തട്ടിപ്പുമായി ബന്ധപ്പെട്ട് കടുത്ത നടപടി നേരിടാന് സാധ്യതയുള്ള ബിജെപി മുതിര്ന്ന നേതാവ് എറണാകുളത്തെ പ്രമുഖ ക്ഷേത്രത്തില് ശത്രുസംഹാര പൂജ നടത്തിയെന്ന് റിപ്പോര്ട്ട്.
എറണാകുളത്ത് രണ്ട് കൊടിമരമുള്ള പ്രശസ്തമായ ക്ഷേത്രത്തിലാണ് ഒരു ലോഡ് പയര് വഴിപാടായി നല്കി ആരോപണവിധേയനായ നേതാവ് പൂജകള് നടത്തിയത്. തെരഞ്ഞെടുപ്പിന് ശേഷം ലക്ഷങ്ങള് വിലമതിക്കുന്ന കാര് സ്വന്തമാക്കിയ ഈ നേതാവിന്റെ സാമ്പത്തിക സ്രോതസ്സിനെക്കുറിച്ച് അന്വേഷണം വേണമെന്ന് ബിജെപിയിലെ ഒരു വിഭാഗം നേതാക്കള് തന്നെ പരസ്യമായി ആവശ്യപ്പെട്ടു തുടങ്ങിയിട്ടുണ്ട്.
കേരളത്തിലും പുറത്തുമായി സ്വന്തം പേരിലും ബെനാമി പേരുകളിലും കോടികളുടെ ഭൂമി ഇയാള് വാങ്ങി കൂട്ടിയതായാണ് ഉയര്ന്നുവരുന്ന പ്രധാന ആരോപണം. തെരഞ്ഞെടുപ്പ് ഫണ്ടില് നിന്ന് മുക്കിയ പണം ഉപയോഗിച്ച് പുതിയ സിനിമ നിര്മ്മിക്കാനുള്ള ശ്രമങ്ങളും ഈ നേതാവ് ആരംഭിച്ചിട്ടുണ്ടത്രേ.
ബിജെപി സംസ്ഥാന പ്രസിഡന്റിന്റെ വലതുകൈയായി നടക്കുന്ന, അടുത്തിടെ ബിജെപിയില് ചേര്ന്ന മധ്യ തിരുവിതാംകൂര്കാരനായ സംസ്ഥാന നേതാവും ഏക്കര കണക്കിന് ഭൂമി വാങ്ങിക്കൂട്ടിയതായി ബിജെപിയിലെ പഴയകാല നേതാക്കള് ആരോപിക്കുന്നു. ക്രൈസ്തവ സമുദായത്തിന്റെ ഇടനിലക്കാരനായി സ്വയം പ്രഖ്യാപിച്ച ഈ നേതാവിന് ബിജെപിയുമായി എന്ത് ബന്ധമാണുള്ളതെന്നും ഇവര് പരസ്യമായി ചോദ്യമുയര്ത്തുന്നു. തിരുവനന്തപുരത്തെ നേതാവാണ് എറണാകുളത്ത് എത്തി ശത്രു സംഹാര പൂജ നടത്തിയതെന്നാണ് സൂചന.
ഫണ്ട് തട്ടിപ്പുമായി ബന്ധപ്പെട്ട് ബിജെപി സംസ്ഥാന കാര്യാലയത്തില് നിന്ന് പുറത്താക്കപ്പെട്ട മഹിളാ നേതാവ് എച്ച്ഡിഎഫ്സി ബാങ്കില് 55 ലക്ഷം രൂപയോളം നിക്ഷേപിച്ചിട്ടുള്ളതായും പുതിയ കാര് വാങ്ങിയതായും വിവരങ്ങള് പുറത്തുവരുന്നുണ്ട്. പുതുതായി എന്ഡിഎയുടെ ഘടകകക്ഷിയായെത്തിയ ഒരു പാര്ട്ടിയുമായുള്ള ഇടപാടില് 40 കോടി രൂപ വരെയാണ് പ്രമുഖ തീവ്ര ഹൈന്ദവ സംഘടനയ്ക്ക് നേതൃത്വം നല്കുന്ന ഒരു നേതാവ് ഒപ്പിച്ചത്.
കേരളത്തില് ഏറെ പ്രതീക്ഷ വെച്ചുപുലര്ത്തുന്ന ബിജെപി കേന്ദ്ര നേതൃത്വത്തെ ഒരു സംഘം തട്ടിപ്പുകാര് കബളിപ്പിക്കുകയാണെന്ന പരിഭവത്തിലാണ് പാര്ട്ടിയിലെ പഴയകാല നേതാക്കള്. അടുത്തിടെ ബിജെപിയോടൊപ്പമെത്തിയ ഇത്തരക്കാരുടെ തട്ടിപ്പുകളില് അമര്ഷമുണ്ടെങ്കിലും, കേന്ദ്ര നേതൃത്വത്തിന്റെ പിന്തുണയോടെ വളരെയധികം ശക്തി പ്രാപിച്ചതിനാല് ഇവരെ എതിര്ക്കാന് മുന്നില് നില്ക്കുന്നവര്ക്ക് സാധിക്കുന്നില്ലെന്നും ഒരു മാധ്യമം റിപ്പോര്ട്ട് ചെയ്തു
ബിജെപി സംസ്ഥാന നേതൃത്വത്തോട് ചേര്ന്നുനില്ക്കുന്നവര് വ്യാപകമായി ഫണ്ട് തിരിമറി നടത്തുകയാണെന്ന ആരോപണം ശരിവെക്കുന്ന തെളിവുകളാണ് പുറത്തുവരുന്നത്. രഹസ്യ സ്വഭാവത്തിലുള്ള ഇവരുടെ പ്രവര്ത്തനം അണികളെയും മുന്നിര നേതാക്കളെയും അകറ്റി ഒരു ഗൂഢസംഘം പോലെയാണെന്നാണ് പഴയകാല നേതാക്കള് കുറ്റപ്പെടുത്തുന്നത്. എന്നിരുന്നാലും തെരഞ്ഞെടുപ്പ് ഫണ്ട് തിരിമറിയെ അത്യന്തം ഗൗരവത്തോടെ കാണുന്ന ബിജെപി കേന്ദ്ര നേതൃത്വം സംഭവം അന്വേഷിച്ച് കടുത്ത നടപടിയിലേക്ക് കടക്കുമെന്നാണ് ലഭിക്കുന്ന സൂചനകള്.
