പറവൂർ: താലൂക്ക് ഗവ. ആശുപത്രി മോർച്ചറിയില് സൂക്ഷിച്ചിരുന്ന മൃതദേഹം ഫ്രീസറിനുള്ളില് അഴുകിയെന്ന പരാതിയെ തുടർന്ന് പുതിയ ഫ്രീസറുകള് സ്ഥാപിക്കാൻ നഗരസഭാ അധികൃതർ നടപടി ആരംഭിച്ചു.
നിലവില് ഒരേസമയം നാല് മൃതദേഹങ്ങള് സൂക്ഷിക്കാൻ കഴിയുന്ന ഒരു ഫ്രീസറും ഒരു മൊബൈല് ഫ്രീസറുമാണ് ആശുപത്രിയിലുള്ളത്. ഇതില് സൂക്ഷിച്ചിരുന്ന രണ്ട് മൃതദേഹങ്ങള് അഴുകിയതായി പരാതി ഉയർന്നിരുന്നു.
15 വർഷത്തിലേറെ പഴക്കമുള്ള ഫ്രീസറുകള്ക്ക് തകരാറുകള് സംഭവിക്കുന്നതിനാലാണ് പ്രശ്നങ്ങള് ആവർത്തിക്കുന്നതെന്നാണ് അധികൃതരുടെ വിലയിരുത്തല്. മൃതശരീരം പഴക്കമുള്ളതായിരുന്നുവെന്ന ആരോപണം ബന്ധുക്കള് നിഷേധിച്ചു. അപകടത്തില് ഗുരുതരമായി പരിക്കേറ്റതിനെ തുടർന്ന് ആശുപത്രിയില് പ്രവേശിപ്പിച്ച ശേഷമാണ് മരണം സംഭവിച്ചതെന്നും, തുടർന്ന് മൃതദേഹം ആശുപത്രിയിലെ ഫ്രീസറില് സൂക്ഷിച്ചതാണെന്നും അവർ പറഞ്ഞു. പോസ്റ്റ്മോർട്ടത്തിനായി മെഡിക്കല് കോളജിലേക്ക് കൊണ്ടുപോയപ്പോഴാണ് മൃതദേഹത്തിന് അഴുകല് സംഭവിച്ചതായി സർജൻ അറിയിച്ചതെന്നും ബന്ധുക്കള് വ്യക്തമാക്കി.
പറവൂർ, വൈപ്പിൻ മേഖലകളില് മുങ്ങിമരണം ഉള്പ്പെടെയുള്ള അസ്വാഭാവിക മരണങ്ങളില്പ്പെട്ടവരുടെ മൃതദേഹങ്ങള് സാധാരണയായി പറവൂർ താലൂക്ക് ഗവ. ആശുപത്രിയിലാണ് എത്തിക്കുന്നത്. പൊലീസ് നിർദേശപ്രകാരം എത്തിക്കുന്ന മൃതദേഹങ്ങളുടെ പഴക്കം സാധാരണയായി മുൻകൂട്ടി പരിശോധിക്കാറില്ലെന്നും അധികൃതർ പറഞ്ഞു. എന്നാല് പൊതുജനങ്ങള് നേരിട്ട് മൃതദേഹവുമായി എത്തുമ്പോള് ആവശ്യമായ വിവരങ്ങള് പരിശോധിക്കാറുണ്ടെന്നും അറിയിച്ചു. പരാതിയെ തുടർന്ന് അടിയന്തര എച്ച്എംസിയോഗം ചേർന്ന് പുതിയ ഫ്രീസറുകള് വാങ്ങുന്നതിനായി 10 ലക്ഷം രൂപ അനുവദിച്ചതായി നഗരസഭ ആരോഗ്യകാര്യ സ്റ്റാൻഡിങ് കമ്മിറ്റി ചെയർപേഴ്സണ് ജോബി പഞ്ഞിക്കാരൻ അറിയിച്ചു.
അതേസമയം, മോർച്ചറിയിലെ ഫ്രീസറില് സൂക്ഷിച്ചിരുന്ന മൃതദേഹം അഴുകിയെന്ന തരത്തിലുള്ള പ്രചാരണം വസ്തുതാവിരുദ്ധമാണെന്ന് ആശുപത്രി അധികൃതർ അറിയിച്ചു. മൂന്ന് ദിവസം പഴക്കമുള്ള അവസ്ഥയിലായിരുന്നു മൃതദേഹം മോർച്ചറിയില് സൂക്ഷിക്കുന്നതിനായി എത്തിച്ചതെന്നും അധികൃതർ വ്യക്തമാക്കി.
