കോട്ടയം: പോഷകങ്ങളാല്‍ സമ്പന്നമാണ് പപ്പായ.
കറുമൂസ, പപ്പായ, കപ്പളങ്ങ തുടങ്ങിയ പല പേരുകളിലും അറിയപ്പെടുന്ന പപ്പായയുടെ പള്‍പ്പും ഇലയും മാത്രമല്ല കുരുവും ആരോഗ്യഗുണങ്ങളാല്‍ സമ്പന്നമാണ്.
നമ്മളില്‍ പലരും പപ്പായ പള്‍പ്പ് കഴിച്ചശേഷം കുരു ഉള്‍പ്പെടെ ഒന്നുകില്‍ മുളപ്പിക്കും അല്ലെങ്കില്‍ വലിച്ചെറിയാറാണ് പതിവ്. അറിയാതെയെങ്കിലും പള്‍പ്പിന്റെ കൂടെ കുരു കഴിച്ചുപോയാല്‍ അനുഭവപ്പെടുന്ന കയ്പ്പും നമ്മുക്കറിയാം.
എന്നാല്‍ ഇവയുടെ പോഷക ഗുണങ്ങളറിഞ്ഞാല്‍ നിങ്ങള്‍ ഇനി വെറുതെ കളയില്ല. ദഹനം മെച്ചപ്പെടുത്താനും ശരീരത്തിലെ വിഷാംശങ്ങള്‍ പുറന്തള്ളാനും രോഗപ്രതിരോധശേഷി വർധിപ്പിക്കാനും പപ്പായ കുരുക്കള്‍ മാത്രം മതി. പപ്പായ കുരുക്കളുടെ ഗുണങ്ങള്‍ എന്തൊക്കെയാണെന്ന് നോക്കാം.
കരളിൻ്റെ ആരോഗ്യം കാക്കും
ശരീരത്തിലെ വിഷാംശങ്ങളെ പുറംന്തള്ളുന്നത് കരളാണ്. പപ്പായ വിത്തുകളിലടങ്ങിയിരിക്കുന്ന ഗ്ലൂക്കോസിനോലേറ്റുകള്‍, ആല്‍ക്കലോയിഡുകള്‍ എന്നിവ കരളിൻ്റെ പ്രവർത്തനം മെച്ചപ്പെടുത്തി കരള്‍ കോശങ്ങളുടെ ഊർജം നിലനിർത്താൻ സഹായിക്കും.
ബാക്ടീരിയകള്‍ക്കെതിരെ പൊരുതും
പപ്പായ കുരുക്കളിലടങ്ങിയിരിക്കുന്ന പ്രധാന ആല്‍ക്കലോയ്ഡായ കാർപെയ്ൻ എന്ന ഘടകത്തിന് ബാക്ടീരിയകളെയും മറ്റും നശിപ്പിക്കാൻ സാധിക്കും. പ്രധാനമായും ഇ-കോളി ബാക്ടീരിയ, സാല്‍മൊണെല്ല തുടങ്ങിയ ബാക്ടീരിയകള്‍ക്കെതിരെ പൊരുതാൻ പപ്പായ കുരുക്കള്‍ക്ക് സാധിക്കുമെന്നാണ് പഠനങ്ങള്‍ വ്യക്തമാക്കുന്നത്.
വൃക്കകളെ സംരക്ഷിക്കും
പപ്പായ കുരുക്കളിലെ ആൻ്റിഓക്‌സിഡൻ്റുകള്‍ വൃക്കകളുടെ വീക്കത്തില്‍ നിന്നും ഓക്‌സിഡേറ്റീവ് സമ്മർദ്ദത്തില്‍ നിന്നും സംരക്ഷിക്കും. അതായത്, ശ്വസന പ്രക്രിയയിലും ഉപാപചയ പ്രവർത്തനങ്ങളിലും ശരീരം ഫ്രീ റാഡിക്കലുകളെ ഉത്പാദിപ്പിക്കാറുണ്ട്. ഇത് ശരീരത്തിലെ ഡിഎൻഎ, കോശങ്ങള്‍ പ്രോട്ടീനുകള്‍ എന്നിവയെ നശിപ്പിക്കാൻ ഇടവരുത്തും. ഇത് തടയാൻ പപ്പായ കുരുക്കള്‍ സഹായിക്കും.
ദഹനം മെച്ചപ്പെടുത്തും
ദഹനം എളുപ്പമാക്കുന്ന പാപ്പെയ്ൻ എന്ന എൻസൈമും ധാരാളം ഫൈബറും പപ്പായ കുരുക്കളിലുണ്ട്. കഴിക്കുന്നതിലൂടെ മലബന്ധം, വയറുവീർക്കല്‍ എന്നിവ അകറ്റി കുടലിൻ്റെ ആരോഗ്യം സംരക്ഷിക്കാൻ സഹായിക്കും.
