പാലക്കാട്: സി.പി.എം പാലക്കാട് ജില്ലാ സെക്രട്ടറി സ്ഥാനത്തുനിന്ന് ഇ.എന്‍. സുരേഷ് ബാബുവിന്റെ അപ്രതീക്ഷിത പുറത്താക്കല്‍ പാര്‍ട്ടിയില്‍ വലിയ കൊടുങ്കാറ്റാണ് സൃഷ്ടിച്ചിരിക്കുന്നത്.
സംഘടനാ വീഴ്ചകള്‍ക്കപ്പുറം ഗുരുതരമായ ധാര്‍മ്മിക അപചയത്തിന്റെ കഥകളാണ് ഇപ്പോള്‍ പുറത്തുവരുന്നത്. പാര്‍ട്ടി ഓഫീസ് കേന്ദ്രീകരിച്ച്‌ നടന്ന അപമാനകരമായ സംഭവങ്ങള്‍ സി.പി.എം നേതൃത്വത്തെയാകെ പ്രതിരോധത്തിലാക്കിയിരിക്കുകയാണ്. പാര്‍ട്ടി കേഡറായ ഒരു യുവ അഭിഭാഷകയോട് ജില്ലാ കമ്മിറ്റി ഓഫീസില്‍ വെച്ച്‌ സുരേഷ് ബാബു മോശമായി പെരുമാറി എന്നതാണ് ഏറ്റവും പ്രധാനപ്പെട്ട കണ്ടെത്തല്‍. സംഘടനാ സമ്മേളനത്തിനെത്തിയ സമയത്തായിരുന്നു സംഭവം. ഇതിനുപുറമെ, കഴിഞ്ഞ ഒരു വര്‍ഷത്തോളമായി ഇയാള്‍ യുവതിയെ ഫോണില്‍ വിളിച്ച്‌ ശല്യപ്പെടുത്തിയിരുന്നതായും പരാതിയില്‍ വ്യക്തമാക്കുന്നുണ്ട്.
വെറുമൊരു വാക്കാല്‍ പരാതി എന്നതിലുപരി, കൃത്യമായ ഡിജിറ്റല്‍ തെളിവുകള്‍ സഹിതമാണ് യുവതി പാര്‍ട്ടി ഉന്നത നേതൃത്വത്തെ സമീപിച്ചത്. സി.പി.എം ജനറല്‍ സെക്രട്ടറി എം.എ. ബേബിക്കും സംസ്ഥാന സെക്രട്ടറി എം.വി. ഗോവിന്ദനും ഡിജിറ്റല്‍ തെളിവുകള്‍ കൈമാറുകയായിരുന്നു. തെളിവുകള്‍ പുറത്തുവന്നതോടെ സുരേഷ് ബാബുവിനെ സംരക്ഷിക്കാന്‍ പാര്‍ട്ടി നേതൃത്വത്തിന് വഴിയില്ലാതായി. വിഷയത്തില്‍ പ്രതിപക്ഷ നേതാവ് പിണറായി വിജയന്‍ നേരിട്ട് ഇടപടുകയായിരുന്നു. സുരേഷ് ബാബുവിനെ മലപ്പുറത്തേക്ക് അടിയന്തരമായി വിളിച്ചുവരുത്താന്‍ പിണറായി നിര്‍ദ്ദേശിച്ചു. ഉന്നത നേതാക്കളുടെ സാന്നിധ്യത്തില്‍ വെച്ച്‌ യുവതിയുടെ പരാതിയും തെളിവുകളും സുരേഷ് ബാബുവിനെ വായിച്ചു കേള്‍പ്പിക്കുകയും ചെയ്തു.
പരാതി വായിച്ചുകേള്‍പ്പിച്ച ശേഷം, കൂടുതല്‍ ചര്‍ച്ചകള്‍ക്ക് നില്‍ക്കാതെ ഉടന്‍ തന്നെ ജില്ലാ സെക്രട്ടറി സ്ഥാനത്തുനിന്ന് ഇറങ്ങാന്‍ പിണറായി വിജയന്‍ ആവശ്യപ്പെടുകയായിരുന്നു. വിവരങ്ങള്‍ പരസ്യമാകാതിരിക്കാന്‍ ലൈംഗിക പീഡന പരാതിയുടെ പേരില്‍ മാറ്റിയെന്ന കാര്യം പുറത്തുപറയരുതെന്ന് സുരേഷ് ബാബു നേതൃത്വത്തോട് അഭ്യര്‍ത്ഥിച്ചതായാണ് വിവരം. തുടര്‍ന്ന് പാലക്കാട് ചേര്‍ന്ന വിശാല ജില്ലാ കമ്മിറ്റി യോഗത്തില്‍ പക്ഷേ ഈ പീഡന പരാതി ഔദ്യോഗികമായി പരാമര്‍ശിക്കപ്പെട്ടില്ല. എന്നാല്‍ കാര്യങ്ങള്‍ പരസ്യമാക്കേണ്ടി വരുമെന്ന അഭിഭാഷകയുടെ മുന്നറിയിപ്പ് പാര്‍ട്ടിക്ക് മുന്നിലുണ്ടായിരുന്നു. ഇതോടെയാണ് സുരേഷ് ബാബു സ്വയം ഒഴിയുന്നതായി പ്രഖ്യാപിക്കാന്‍ വഴി ഒരുങ്ങിയത്.
എന്നാല്‍, വെറുമൊരു സ്ഥാനമൊഴിയലില്‍ മാത്രം കാര്യങ്ങള്‍ ഒതുങ്ങാന്‍ സാധ്യതയില്ലെന്നാണ് പുറത്തുവരുന്ന വിവരങ്ങള്‍ സൂചിപ്പിക്കുന്നത്. പാര്‍ട്ടി അംഗത്വത്തില്‍ നിന്ന് തന്നെ സുരേഷ് ബാബുവിനെ പുറത്താക്കാന്‍ പാര്‍ട്ടി ആലോചിക്കുന്നുണ്ട്. വിപുലീകൃത ജില്ലാ കമ്മിറ്റികള്‍ പൂര്‍ത്തിയായ ശേഷം ചേരുന്ന സംസ്ഥാന സെക്രട്ടേറിയറ്റ് യോഗത്തിലാകും അന്തിമതീരുമാനം. പീഡന പരാതിക്ക് പുറമെ, പാലക്കാട് ജില്ലയിലെ സി.പി.എമ്മില്‍ വിഭാഗീയത ആളിക്കത്തിച്ചതിലും സുരേഷ് ബാബുവിന് വലിയ പങ്കുണ്ടെന്ന് വിമര്‍ശനമുണ്ട്. കഴിഞ്ഞ തിരഞ്ഞെടുപ്പില്‍ ജില്ലയിലെ മൂന്ന് മണ്ഡലങ്ങളില്‍ പാര്‍ട്ടി സ്ഥാനാര്‍ത്ഥികള്‍ നേരിട്ട തിരിച്ചടിക്ക് കാരണം സുരേഷ് ബാബുവിന്റെ ഇല്ലാത്ത ശാഠ്യങ്ങളും നിലപാടുകളുമാണെന്ന് കമ്മിറ്റിയില്‍ വിമര്‍ശനമുയര്‍ന്നു.
സമ്മേളന കാലയളവല്ലാതെ ഒരു ജില്ലാ സെക്രട്ടറിയെ ഇത്തരത്തില്‍ പെട്ടെന്ന് നീക്കം ചെയ്യുന്നത് സി.പി.എമ്മില്‍ അത്യപൂര്‍വ്വമായ നടപടിയാണ്. തെരഞ്ഞെടുപ്പ് തോല്‍വിയുമായി ബന്ധപ്പെട്ട തിരുത്തല്‍ നടപടികള്‍ എന്ന വ്യാജേനയാണ് സ്ഥാനമാറ്റം നടന്നതെങ്കിലും, അണിയറയില്‍ വിഷയം വന്‍ സ്‌ഫോടനത്തിന് വഴിവെച്ചിരിക്കുകയാണ്. സംസ്ഥാന സെക്രട്ടറി എം.വി. ഗോവിന്ദന്റെ സാന്നിധ്യത്തില്‍ ചേര്‍ന്ന യോഗത്തിലാണ് മാറ്റം ഔദ്യോഗികമാക്കിയത്. തുടര്‍ന്ന് മുന്‍ എം..എല്‍.എ വി. ചെന്താമരാക്ഷനെ പുതിയ ജില്ലാ സെക്രട്ടറിയായി പാര്‍ട്ടി ചുമതലപ്പെടുത്തി. കാവശേരിയില്‍ നിന്നുള്ള മുതിര്‍ന്ന നേതാവായ ചെന്താമരാക്ഷന്റെ പൊതുസ്വീകാര്യത കണക്കിലെടുത്താണ് ഈ തീരുമാനം.
അതിനിടെ, സംഭവം വാര്‍ത്തയായതോടെ വിഷയത്തെ ലളിതവല്‍ക്കരിക്കാനാണ് സുരേഷ് ബാബു ശ്രമിച്ചത്. വ്യക്തിപരമായ കാരണങ്ങളാല്‍ താന്‍ സ്വയം മാറുകയാണെന്നും, തന്നേക്കാള്‍ പ്രബലനായ ജില്ലാ സെക്രട്ടറിയായി ചെന്താമരാക്ഷന്‍ മാറുമെന്നുമാണ് ഇയാള്‍ വാര്‍ത്താസമ്മേളനത്തില്‍ അവകാശപ്പെട്ടത്. പുതിയ സെക്രട്ടറിയും പരാതിയെക്കുറിച്ച്‌ പ്രതികരിക്കാന്‍ തയ്യാറായില്ല. എന്നാല്‍ കാര്യങ്ങള്‍ അവിടെ അവസാനിക്കുന്നില്ല. അടുത്ത സംസ്ഥാന കമ്മിറ്റി യോഗത്തില്‍ ഇ.എന്‍. സുരേഷ് ബാബുവിനെതിരെ അന്വേഷണ കമ്മീഷനെ വെയ്ക്കാന്‍ സാധ്യതയുണ്ട്. ലൈംഗിക പീഡന പരാതിയും സംഘടനാപരമായ മറ്റു വീഴ്ചകളും ഈ കമ്മീഷന്‍ വിശദമായി അന്വേഷിക്കും.
പാര്‍ട്ടി ഓഫീസിനുള്ളില്‍ വിളിച്ചുവരുത്തി സ്വന്തം പ്രവര്‍ത്തകയെ അപമാനിച്ചതിന്റെ വ്യക്തമായ കോള്‍ റെക്കോര്‍ഡിംഗുകളും സന്ദേശങ്ങളും യുവതി നല്‍കിയിട്ടുണ്ട്. ജില്ലയില്‍ നിന്നുള്ള കേന്ദ്ര, സംസ്ഥാന വനിതാ നേതാക്കള്‍ യുവതിയുടെ പീഡന പരാതി പ്രാഥമികമായി അന്വേഷിച്ച്‌ ഉറപ്പുവരുത്തിയ ശേഷമാണ് നടപടികളിലേക്ക് കടന്നത്. സുരേഷ് ബാബുവിനെ പാര്‍ട്ടിയുടെ മുഴുവന്‍ ചുമതലകളില്‍ നിന്നും പുറത്താക്കണമെന്ന ശക്തമായ നിലപാടാണ് ജില്ലാ സെക്രട്ടറിയേറ്റിലെയും ജില്ലാ കമ്മിറ്റിയിലെയും ഭൂരിഭാഗം അംഗങ്ങളും ഉയര്‍ത്തുന്നത്. ഇത്തരം ഗുരുതരമായ ആരോപണങ്ങള്‍ നിലനില്‍ക്കെ ഇയാള്‍ പദവികളില്‍ തുടരുന്നത് രാഷ്ട്രീയമായി വലിയ തിരിച്ചടിയാകുമെന്ന് നേതൃത്വം വിലയിരുത്തുന്നു.
പാര്‍ട്ടിയില്‍ നിന്ന് പുറത്താക്കപ്പെട്ട മുന്‍ നേതാവ് പി.കെ. ശശിയും സംഭവത്തില്‍ രൂക്ഷമായ പ്രതികരണവുമായി രംഗത്തെത്തി. 'ധിക്കാരത്തിന്റെയും ഗുണ്ടായിസത്തിന്റെയും ഫലം കണ്ടുതുടങ്ങി' എന്നായിരുന്നു സുരേഷ് ബാബുവിനെതിരെ ശശി പ്രതികരിച്ചത്. മുന്‍പ് ശശിക്കെതിരെയുള്ള നടപടികളില്‍ മുന്‍പന്തിയിലുണ്ടായിരുന്ന ആളായിരുന്നു സുരേഷ് ബാബു. പാര്‍ട്ടി ഓഫീസ് കേന്ദ്രീകരിച്ച്‌ നടന്ന ഈ അപമാനം സി.പി.എമ്മിന്റെ ധാര്‍മ്മിക അടിത്തറയെത്തന്നെയാണ് ചോദ്യം ചെയ്യുന്നത്. വനിതാ പ്രവര്‍ത്തകര്‍ക്ക് പാര്‍ട്ടി ഓഫീസുകളില്‍ പോലും സുരക്ഷിതത്വമില്ലെന്ന അവസ്ഥ എതിരാളികള്‍ വലിയ രാഷ്ട്രീയ ആയുധമാക്കുമെന്ന ഭയവും നേതൃത്വത്തിനുണ്ട്.
അതുകൊണ്ടുതന്നെ, പരാതിയില്‍ കടുത്ത തുടര്‍നടപടികള്‍ ഉണ്ടാകുമെന്ന സൂചന തന്നെയാണ് എം.വി. ഗോവിന്ദനും നല്‍കുന്നത്. പരാതി പരിശോധിച്ച ശേഷമായിരിക്കും മറ്റു പാര്‍ട്ടി നടപടികളെന്ന് അദ്ദേഹം മാധ്യമങ്ങളോട് പ്രതികരിച്ചു. നിലവില്‍ പാര്‍ട്ടി നിര്‍ദ്ദേശപ്രകാരം സുരേഷ് ബാബുവിനെ മാറ്റി നിര്‍ത്തപ്പെട്ടിട്ടുണ്ടെങ്കിലും, അച്ചടക്ക നടപടിയുടെ ഭാഗമായി പാര്‍ട്ടി പ്രാഥമിക അംഗത്വത്തില്‍ നിന്നും ഇയാളെ നീക്കം ചെയ്‌തേക്കും. നിയമനടപടികളിലേക്ക് കാര്യം കടന്നാല്‍ പാര്‍ട്ടി കൂടുതല്‍ പ്രതിരോധത്തിലാകും.
അതേസമയം, തിരികെ വീട്ടിലെത്തിയ പരാതിക്കാരിയായ യുവതി തനിക്ക് നീതി ലഭിക്കുമെന്ന പ്രതീക്ഷയിലാണ്. പാര്‍ട്ടി തലത്തില്‍ അര്‍ഹിക്കുന്ന ശിക്ഷ സുരേഷ് ബാബുവിന് ലഭിച്ചില്ലെങ്കില്‍ വിഷയം പരസ്യമാക്കാനും നിയമനടപടികളുമായി മുന്നോട്ടുപോകാനും യുവതി തയ്യാറെടുക്കുന്നുണ്ട്. ചുരുക്കത്തില്‍, പാലക്കാട്ടെ സി.പി.എമ്മിലെ അധികാര സമവാക്യങ്ങളെ പൂര്‍ണ്ണമായും തിരുത്തിക്കുറിച്ച സംഭവമായി ഇത് മാറിയിരിക്കുന്നു. ഇ.എന്‍. സുരേഷ് ബാബുവിന്റെ രാഷ്ട്രീയ ഭാവി തന്നെ അനിശ്ചിതത്വത്തിലാക്കിയ ഈ വിവാദം വരും ദിവസങ്ങളില്‍ കൂടുതല്‍ വഴിത്തിരിവുകളിലേക്ക് കടക്കാനാണ് സാധ്യത.
