കോട്ടയം:മോഷണക്കുറ്റം ആരോപിച്ച് ആദിവാസി യുവാവിനെ ക്രൂരമായി തല്ലിച്ചതച്ച് പൊലീസ്.
പൂഞ്ഞാർ പെരിങ്ങളം സ്വദേശി പി ആർ അഭിലാഷിനെയാണ് പൊലീസ് കസ്റ്റഡിയിൽ മർദിച്ചത്.
സ്വകാര്യ വാഹനത്തിൽ എത്തിയാണ് പൊലീസ് കസ്റ്റഡിയിൽ എടുത്തത്.
ഇന്നലെ രാവിലെയായിരുന്നു പൊലീസ് അഭിലാഷിനെ കസ്റ്റഡിയിൽ എടുത്തത്.
വൈദ്യുതി കമ്പി മോഷ്ടിച്ചെന്ന് ആരോപിച്ചാണ് അഭിലാഷിനെ കസ്റ്റഡിയിലെടുത്തത്.
സ്റ്റേഷനിലേക്ക് കൊണ്ടുപോകും വഴി വാഹനത്തിൽ വെച്ച് മർദിച്ചെന്നാണ് യുവാവിൻ്റെ പരാതി.
സ്റ്റേഷനിലെത്തിച്ച ശേഷം അഭിലാഷിനെ വിട്ടയച്ചതായും പറയുന്നു.
അഭിലാഷ് നിലവിൽ കോട്ടയം മെഡിക്കൽ കോളേജ് ആശുപത്രിയിൽ ചികിത്സയിലാണ്.
സംഭവത്തിൽ പാലാ ഡി വൈ എസ് പിക്ക് അഭിലാഷ് പരാതി നൽകിയിട്ടുണ്ട്.
പൊലീസ് അകാരണമായി ക്രൂരമായി മർദിച്ചുവെന്നും അടിവസ്ത്രം പോലും ഇടാൻ അനുവദിച്ചില്ലെന്നും അഭിലാഷിന്റെ സഹോദരൻ ടി ടി വിനീഷും പറഞ്ഞു.
പൊലീസ് സ്റ്റേഷനിൽ നിന്ന് വിട്ടയച്ചപ്പോൾ തന്നെ അഭിലാഷിന് ആരോഗ്യപ്രശ്നങ്ങൾ ഉണ്ടായെന്ന് എസ് ടി പ്രമോട്ടർ ജിഷ്ണു തങ്കച്ചൻ പറഞ്ഞു.
നിയമനടപടികളുമായി മുന്നോട്ടു പോകുമെന്നും അദ്ദേഹം അറിയിച്ചു. അതേസമയം കസ്റ്റഡി മർദന പരാതി പൊലീസ് നിഷേധിച്ചു.
