കറുകച്ചാൽ : ക്രൈസ്തവ സംഗീതലോകത്തെ അതുല്യ വ്യക്തിത്വങ്ങളെ ആദരിക്കുന്നതിനായി, പുന്നവേലി സെന്റ് തോമസ് മാർത്തോമാ ഇടവക ഗായകസംഘം ഒരു സംഗീത സായാഹ്നം സംഘടിപ്പിക്കുന്നു.
പുന്നവേലി സെന്റ് തോമസ് മാർത്തോമ്മാ പള്ളിയിൽ വെച്ച് നാളെ ഞായറാഴ്ച വൈകുന്നേരം 6 മണി മുതൽ നടത്തപ്പെടുന്ന സംഗീത സായാഹ്നത്തിൽ, എണ്ണമറ്റ ക്രിസ്തീയ ഗാനങ്ങൾക്ക് വരികളും ഈണവും നൽകിയ പി. ഡി. ജോൺ, നൈനാൻ കെ. പുന്നവേലി എന്നിവരെയാണ് ആദരിക്കുന്നത്.
തലമുറകൾ ഏറ്റുപാടിയ ജനപ്രിയ ഗാനങ്ങൾ കോർത്തിണക്കിക്കൊണ്ട് ഇടവക ഗായകസംഘം അണിയിച്ചൊരുക്കുന്ന സംഗീത സമർപ്പണം സ്നേഹത്തിന്റെയും കൃതജ്ഞതയുടെയും പ്രകാശനമാണ്.
തീക്ഷണമായ ജീവിതാനുഭവങ്ങളുടെ മധ്യത്തിലും ദൈവത്തിലുള്ള വിശ്വാസം വിളിച്ചോതുന്ന 'പ്രാര്‍ത്ഥനക്കുത്തരം നല്കുന്നോനെ...' എന്നാരംഭിക്കുന്ന ഗാനമുൾപ്പെടെ ഒട്ടനവധി ഗാനങ്ങൾ സംഭാവന ചെയ്ത ക്രൈസ്തവ ഗാനരംഗത്തെ വിശിഷ്‌ട വ്യക്തി എന്ന നിലയിലാണ് പി. ഡി. ജോണിനെ ആദരിക്കുന്നത്.
ദൈവം നൽകിയ സമൃദ്ധമായ നന്മകൾ വാഴ്ത്തി പാടുന്ന 'നന്ദിയാലെന്നുള്ളം തിങ്ങുകയാൽ...' എന്നാരംഭിക്കുന്ന ഗാനമുൾപ്പെടെ നിരവധി ഗാനങ്ങൾക്ക് ജന്മം നൽകിയ ശ്രീ. നൈനാൻ കെ. പുന്നവേലി നാടിനെ ആത്മീയ സംഗീതത്തിന്റെ ഭൂപടത്തിൽ അടയാളപ്പെടുത്തിയാണ് മാതൃ ഇടവകയുടെ ആദരവുകൾ ഏറ്റുവാങ്ങുന്നത്.
'യാഹെൻ സംഗീതം' എന്ന പേരിൽ ക്രമീകരിക്കുന്ന ഈ സായാഹ്ന സംഗമത്തിൽ ഇരുവരും അനുഭവങ്ങൾ പങ്കിടുന്നതും ഗാനരചനകളുടെ പശ്ചാത്തലം വിവരിക്കുന്നതുമാണ്. ഡിപ്പാർട്ട്മെന്റ് ഓഫ് സേക്രഡ് മ്യൂസിക് ആൻഡ് കമ്മ്യൂണിക്കേഷൻസ് (DSMC) ഡയറക്ടർ റവ. ഉമ്മൻ കെ. ജേക്കബ്, ആലാപന ശൈലിയിലൂടെ ജനശ്രദ്ധ നേടിയ പുരോഹിതനും ഗായകനുമായ റവ. ഫാ. സെവേറിയോസ് തോമസ് എന്നിവരെ കൂടാതെ മല്ലപ്പള്ളി മേഖല ക്ലെറോസ് ഗായക സംഘവും സംഗീത സായാഹ്നത്തിൽ ഗാനങ്ങൾ ആലപിക്കുന്നതാണ്.
സ്മരണികയുടെ പ്രകാശനം ഡി. എസ്. എം. & സി. മുൻ ഡയറക്ടർ റവ. ജോൺ മത്തായി നിർവഹിക്കും. ഇടവക അംഗങ്ങളായ റവ. തോമസ് മാത്യു, റവ. നിതിൻ പി. ഷിബു എന്നിവരെ കൂടാതെ മല്ലപ്പള്ളി സെന്ററിലും പുന്നവേലി എക്യുമെനിക്കൽ കൂട്ടായ്മയിലും ഉൾപ്പെട്ട വൈദികരും സംബന്ധിക്കും.
സംഗീതരംഗത്ത് സമാനതകളില്ലാത്ത ഇടപെടലുകൾ നടത്തിയവരെ ആദരിക്കുന്ന ഈ സംഗീത സായാഹ്നത്തിന്റെ ഭാഗമായി ഉള്ള കാരുണ്യ പ്രവർത്തനങ്ങളും മാതൃകാപരമാണെന്ന് ഗായക സംഘം പ്രസിഡന്റ് റവ. സുനിൽ ജോർജ് മാത്യു, സെക്രട്ടറി മാത്യു ജോർജ്, ട്രഷറർ അനു എ. സാമുവേൽ, കൺവീനർ ജോബി ജോയി മാത്യു എന്നിവർ അറിയിച്ചു. റവ. സുനിൽ ജോർജ് മാത്യു (പ്രസിഡന്റ്), നൈനാൻ കെ. പുന്നവേലി (ക്വയർ മാസ്റ്റർ), എലിസബേത്ത് ചെറിയാൻ (വൈസ് പ്രസിഡന്റ്), മാത്യു ജോർജ് (സെക്രട്ടറി), ജോബി ജോയി മാത്യു (പ്രോഗ്രാം കൺവീനർ), രേഷ്മ ജോൺ (ജോയിന്റ് ലീഡർ), അനു എ. സാമുവേൽ (ട്രഷറർ), സോജ സജി (കൺവീനർ, പബ്ലിസിറ്റി കമ്മിറ്റി), ലെനി വി. പോൾ (കൺവീനർ, റിസപ്ഷൻ കമ്മിറ്റി), ഷിബു വി. മാത്യു (കൺവീനർ, ലോജിസ്റ്റിക് കമ്മിറ്റി) എന്നിവരടങ്ങിയ സംഘാടക സമിതി ക്രമീകരണങ്ങൾക്ക് നേതൃത്വം നൽകുന്നു.
