ഇന്നത്തെ കാലത്ത് കുട്ടികള്‍ മുതല്‍ മുതിര്‍ന്നവര്‍ വരെ നേരിടുന്ന പ്രധാന ആരോഗ്യപ്രശ്‌നങ്ങളില്‍ ഒന്നാണ് കഴുത്തുവേദനയും നടുവേദനയും.
മണിക്കൂറുകളോളം സ്മാര്‍ട്ട്‌ഫോണ്‍ ഉപയോഗിക്കുന്നത്, കമ്പ്യൂട്ടറിന് മുന്നില്‍ തെറ്റായ രീതിയില്‍ ഇരുന്നു ജോലി ചെയ്യുന്നത്തു
ടങ്ങിയ അനാരോഗ്യകരമായ ശീലങ്ങള്‍ പേശികളിലും നട്ടെല്ലിലും അമിതമായ ഭാരമാണ് ഉണ്ടാക്കുന്നത്. തുടക്കത്തില്‍ ചെറിയ തോതില്‍ അനുഭവപ്പെടുന്ന അസ്വസ്ഥതകള്‍ പിന്നീട് നിത്യജീവിതത്തെ തന്നെ ബാധിക്കുന്ന തരത്തിലേക്ക് മാറിയേക്കാം.
ഈ പ്രശ്‌നങ്ങള്‍ക്ക് പിന്നിലുള്ള പ്രധാനപ്പെട്ട അഞ്ച് കാരണങ്ങളും അവ ഒഴിവാക്കാനുള്ള വഴികളും എന്തൊക്കെയാണെന്നു നോക്കാം
മണിക്കൂറുകളോളം ഒരേ രീതിയില്‍ ഇരുന്നുള്ള ജോലി
ഓഫീസുകളിലും വീടുകളിലും ലാപ്‌ടോപ്പുകള്‍ക്ക് മുന്നില്‍ ദീര്‍ഘനേരം ഒരേ ഇരുപ്പില്‍ ജോലി ചെയ്യുന്നത്
കഴുത്തിലും തോളിലും നടുവിലുമുള്ള പേശികളില്‍ വലിയ രീതിയില്‍ ആയാസം ഉണ്ടാക്കും.
കസേരയില്‍ മുന്നോട്ട് കൂനിക്കൂടി ഇരിക്കുന്നതും നടുവിന് കൃത്യമായ താങ്ങ് ലഭിക്കാത്തതുമാണ് പ്രശ്‌നം വഷളാക്കുന്നത്.
പരിഹാരം- നടുവിന് ആവശ്യമായ സപ്പോര്‍ട്ട് നല്‍കുന്ന കസേരകള്‍ ഉപയോഗിക്കുക. കാലുകള്‍ തറയില്‍ ഉറപ്പിച്ചുവച്ച് ഇരിക്കുക.
കമ്പ്യൂട്ടര്‍ സ്‌ക്രീന്‍ കണ്ണിന്റെ നേര്‍രേഖയില്‍ ക്രമീകരിക്കുകയും ഇടയ്ക്കിടെ എഴുന്നേറ്റ് നിന്ന് ശരീരം ഒന്ന് ഇളക്കി കൊടുക്കുകയും ചെയ്യുക.
തല കുനിച്ച് മൊബൈല്‍ ഫോണ്‍ ഉപയോഗിക്കുന്നത്
ഫോണ്‍ നോക്കുമ്പോള്‍ തല വശങ്ങളിലേക്കോ താഴേക്കോ ഏറെ നേരം കുനിച്ചുപിടിക്കുന്നത് കഴുത്തിലെ പേശികളില്‍ ഭാരം വര്‍ധിപ്പിക്കും. ഇത് തോളിലും കഴുത്തിലും ശക്തമായ മുറുക്കത്തിനും വേദനയ്ക്കും കാരണമാകും.
.പരിഹാരം-ഫോണ്‍ ഉപയോഗിക്കുമ്പോള്‍ അത് കഴിയുന്നത്ര കണ്ണിന്റെ നേര്‍ക്ക് ഉയര്‍ത്തിപ്പിടിക്കുക. തുടര്‍ച്ചയായി തല കുനിച്ചിരിക്കുന്നത് ഒഴിവാക്കി, ഇടയ്ക്ക് കഴുത്തും തോളും സാവധാനം ചലിപ്പിക്കുക.
തെറ്റായ രീതിയിലുള്ള ഉറക്കം
രാവിലെ എണീക്കുമ്പോള്‍ അനുഭവപ്പെടുന്ന കഴുത്തുവേദന പലപ്പോഴും തെറ്റായ രീതിയിലുള്ള ഉറക്കം കൊണ്ടോ അനുയോജ്യമല്ലാത്ത തലയിണ ഉപയോഗിക്കുന്നത് കൊണ്ടോ ആകാം.
പരിഹാരം- കഴുത്തിനും നട്ടെല്ലിനും സ്വാഭാവികമായ ആശ്വാസം നല്‍കുന്ന പാകത്തിലുള്ള തലയിണ തിരഞ്ഞെടുക്കുക.
ചരിഞ്ഞോ മലര്‍ന്നോ കിടക്കുമ്പോള്‍ സുഖകരമായ രീതികള്‍ ശീലമാക്കുക.
നടുവേദനയുള്ളവര്‍ക്ക് കാല്‍മുട്ടുകള്‍ക്കിടയില്‍ ചെറിയൊരു തലയിണ വെക്കുന്നത് ആശ്വാസം തരും.
വ്യായാമമില്ലാത്ത ഇരിപ്പുവശമുള്ള ജീവിതശൈലി
ശാരീരിക ചലനങ്ങളും വ്യായാമങ്ങളും ഇല്ലാതിരിക്കുന്നത് ശരീരത്തിലെ പേശികളുടെ ബലവും പ്രവര്‍ത്തനക്ഷമതയും കുറയ്ക്കും.നടുവിനെയും വയറിനെയും താങ്ങിനിര്‍ത്തുന്ന പേശികള്‍ക്ക് ബലമില്ലാതെ
വരുമ്പോള്‍ ചെറിയ ജോലികള്‍ ചെയ്യുമ്പോള്‍ പോലും നടുവേദന അനുഭവപ്പെടാം.
പരിഹാരം- ദിവസവും ലളിതമായ രീതിയില്‍ നടക്കാനോ ചെറിയ വ്യായാമങ്ങള്‍ ചെയ്യാനോ സമയം കണ്ടെത്തുക. പുതിയ വ്യായാമങ്ങള്‍ ചെയ്യുമ്പോള്‍ ശരീരം പെട്ടെന്ന് വരുതിയിലാക്കാന്‍ ശ്രമിക്കാതെ പതുക്കെ തുടങ്ങുക.
തെറ്റായ രീതിയില്‍ ഭാരമുള്ള വസ്തുക്കള്‍ ഉയര്‍ത്തുന്നത്
വീട്ടുജോലികള്‍ ചെയ്യുമ്പോഴോ സാധനങ്ങള്‍ എടുത്തുയര്‍ത്തുമ്പോഴോ കാല്‍മുട്ടുകള്‍ മടക്കാതെ അരക്കെട്ട് മാത്രം കുനിച്ച് ഭാരം പൊക്കുന്നത് നട്ടെല്ലിന് ഗുരുതരമായ പരിക്കുകള്‍ ഉണ്ടാക്കിയേക്കാം. ഒറ്റവശത്തേക്ക് മാത്രം ഭാരമുള്ള ബാഗുകള്‍ തൂക്കുന്നതും പ്രശ്‌നം കൂട്ടും.
പരിഹാരം- ഭാരമുള്ള വസ്തുക്കള്‍ എടുക്കുമ്പോള്‍ അവയോട് ചേര്‍ന്ന് നിന്ന്, കാല്‍മുട്ടുകള്‍ മടക്കി കാലുകളുടെ ബലം ഉപയോഗിച്ച് ഉയര്‍ത്തുക. ഭാരം ഇരുവശങ്ങളിലേക്കും തുല്യമായി വീതിച്ചു നല്‍കാന്‍ ശ്രദ്ധിക്കുക.
ശീലങ്ങളില്‍ വരുത്തുന്ന ഇത്തരം ചെറിയ മാറ്റങ്ങളിലൂടെ ഒരു പരിധി വരെ കഴുത്ത്‌നടുവേദനകളില്‍ നിന്ന് മോചനം നേടാം. എങ്കിലും വേദന തുടര്‍ച്ചയായി നില്‍ക്കുകയാണെങ്കില്‍ ഡോക്ടറുടെ സേവനം തേടാന്‍ ഒരിക്കലും മടിക്കരുത്.
