കോട്ടയം: പോലീസ് പരിശോധനയ്ക്കിടെ ഉദ്യോഗസ്ഥരെ വാഹനമിടിച്ച് അപായപ്പെടുത്താൻ ശ്രമിച്ച കേസിൽ ഒന്നാം പ്രതിയെ പോലീസ് അറസ്റ്റ് ചെയ്തു.
പത്തനംതിട്ട കൊടുമൺ ഇടത്തിട്ട പി.ഒ. പ്ലാവിലയിൽ വീട്ടിൽ ബിജു സോമരാജിന്റെ മകൻ അഭിനന്ദ് (21) ആണ് പിടിയിലായത്. തിരുവനന്തപുരത്ത് നിന്നാണ് ഇയാളെ പോലീസ് സംഘം കണ്ടെത്തി അറസ്റ്റ് ചെയ്തത്.
കഴിഞ്ഞ നവംബർ 11-ന് രാത്രി 11.45-ഓടെ മണിമല ബസ് സ്റ്റാൻഡ് ഭാഗത്തായിരുന്നു സംഭവം. പോലീസ് പരിശോധന നടക്കുന്നത് കണ്ട് KL 03 G 4937 നമ്പർ മാരുതി കാർ ഓടിച്ചിരുന്ന അഭിനന്ദ് വാഹനം അതിവേഗത്തിൽ പിന്നോട്ടെടുത്ത് പോലീസ് വാഹനത്തിൽ ഇടിച്ച് കേടുപാടുകൾ വരുത്തി. തുടർന്ന് അമിതവേഗത്തിൽ കടന്നുകളഞ്ഞ കാറിനെ പോലീസ് സംഘം പിന്തുടർന്നു.
കടയനിക്കാട് ഭാഗത്തെത്തിയപ്പോൾ കാർ റോഡരികിലേക്ക് വെട്ടിത്തിരിച്ച് തടസ്സമായി നിർത്തി. വാഹനത്തിനടുത്തേക്ക് എത്തിയ പോലീസ് ഉദ്യോഗസ്ഥരെ അപായപ്പെടുത്തുകയെന്ന ഉദ്ദേശത്തോടെ പ്രതി വീണ്ടും കാർ പിന്നോട്ടെടുത്തു. ഇതിനിടെ ചാടിമാറാൻ ശ്രമിച്ച പോലീസ് ഉദ്യോഗസ്ഥന്റെ കൈയിൽ വാഹനമിടിച്ച് പരിക്കേൽക്കുകയും ചെയ്തു. തുടർന്ന് പ്രതി വീണ്ടും കാർ അതിവേഗത്തിൽ ഓടിച്ചുപോയി.
കാറിലുണ്ടായിരുന്ന രണ്ടുമുതൽ അഞ്ചുവരെ പ്രതികൾ ഒന്നാം പ്രതിയെ രക്ഷപ്പെടാൻ പ്രേരിപ്പിക്കുകയും സഹായിക്കുകയും ചെയ്തതായാണ് കേസ്.
കോട്ടയം ജില്ലാ പോലീസ് മേധാവി സാബു മാത്യു IPS-ന്റെ മേൽനോട്ടത്തിൽ കാഞ്ഞിരപ്പള്ളി ഡിവൈ.എസ്.പി. റിജോ പി. ജോസഫിന്റെയും എരുമേലി സർക്കിൾ ഇൻസ്പെക്ടർ സുരേഷ് എം. ആറിന്റെയും നേതൃത്വത്തിൽ മണിമല എസ്.എച്ച്.ഒ. ജ്യോതിഷ് ജയൻ, എസ്.ഐ. ശശികുമാർ കെ.കെ., എസ്.സി.പി.ഒ. രഞ്ജിത് എസ്. നായർ, സി.പി.ഒ.മാരായ ശരത് ചന്ദ്രൻ, അഭിലാഷ് സി.കെ., സോബിൻ പീറ്റർ എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്.
കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. കേസിലെ മറ്റ് പ്രതികൾക്കായുള്ള അന്വേഷണം പുരോഗമിക്കുകയാണ്.
