കോട്ടയം: കുട്ടികളിലെ ഓട്ടിസം സ്പെക്ട്രം അവസ്ഥകളെക്കുറിച്ചും അവരുടെ സമഗ്ര വികസനത്തിനായുള്ള ശാസ്ത്രീയ ഇടപെടലുകളെക്കുറിച്ചും ചർച്ച ചെയ്യുന്നതിനായി
സംഘടിപ്പിച്ച ത്രിദിന അന്താരാഷ്ട്ര കോൺഫറൻസ് ബിസിഎം കോളേജിൽ നവംബർ 10 മുതൽ12 വരെ നടന്നു.
ബിസിഎം കോളേജ്, യുകെയിലെ സാൽഫോർഡ് യൂണിവേഴ്സിറ്റി, യുഎസ്എയിലെ ഇന്റർനാഷണൽ ഇൻസ്റ്റിറ്റ്യൂട്ട് ഫോർ സയന്റിഫിക് ആൻഡ് അക്കാദമിക് കൊളാബറേഷൻസ് (IISAC) എന്നിവ സംയുക്തമായാണ് സമ്മേളനം സംഘടിപ്പിച്ചത്.
കോളേജ് മാനേജർ ഫാ. അബ്രഹാം പറമ്പേട്ട് ഉദ്ഘാടനം ചെയ്തു.
ഓട്ടിസം സ്പെക്ട്രം അവസ്ഥകളുള്ള കുട്ടികളെ സമൂഹം കരുതലോടെയും അംഗീകാരത്തോടെയും ചേർത്തുനിർത്തേണ്ടതിന്റെ പ്രാധാന്യം അദ്ദേഹം ചൂണ്ടിക്കാട്ടി.
ബിസിഎം കോളേജ് പ്രിൻസിപ്പൽ പ്രൊഫ. ഡോ. തോമസ് കെ.വി., ഡോ. ബ്രെൻഡൻ മൊണ്ടെയ്റോ (യൂണിവേഴ്സിറ്റി ഓഫ് സാൽഫോർഡ്), ഡോ. സണ്ണി ലൂക്ക് (IISAC) എന്നിവർ സംസാരിച്ചു.
ശിശുരോഗചികിത്സ, മനഃശാസ്ത്രം, പ്രത്യേക വിദ്യാഭ്യാസം തുടങ്ങിയ മേഖലകളിലെ പ്രമുഖ വിദഗ്ധർ വിവിധ അക്കാദമിക് സെഷനുകൾക്ക് നേതൃത്വം നൽകി.
മുൻ കേരള ആരോഗ്യ സർവകലാശാല വൈസ് ചാൻസലർ ഡോ. എം.കെ.സി. നായർ, ഡോ. മഞ്ജു ജോർജ്, ഡോ. ഗ്ലാഡി ജോർജ്,
ഡോ. ജിതിൻ പങ്കജ്, സൈക്കോളജിസ്റ്റ് ഓഷീൻ റെജി പോൾ, സ്പെഷ്യൽ എഡ്യൂക്കേറ്റർ ഫെബ ആലിസ് തോമസ് എന്നിവർ വിഷയങ്ങൾ അവതരിപ്പിച്ചു.
ഭിന്നശേഷി മേഖലയിലെ പുനരധിവാസ സേവനപ്രവർത്തനങ്ങൾക്കും നൂതന പരിശീലനരീതികളിലൂടെ കുട്ടികളുടെ കഴിവുകൾ വികസിപ്പിക്കുന്നതിനും നൽകിയ സമഗ്ര സംഭാവനകൾ പരിഗണിച്ച്
12 പേർക്ക് മാർ തോമസ് തറയിൽ പിതാവിന്റെ പേരിലുള്ള പ്രഥമ പുരസ്‌കാരം (ഗുഡ് സമരിറ്റൻ അവാർഡ് )നൽകി ആദരിച്ചു.
ഇൻക്ലൂസീവ് അക്വാട്ടിക്സ് അഡാപ്റ്റീവ് ഹൈഡ്രോതെറാപ്പി എന്നീ പരിശീലനരീതികളിലൂടെ നൂറുകണക്കിന് കുട്ടികളുടെ ശാരീരികവും
മാനസികവുമായ നേട്ടങ്ങൾ ജീവൻ രക്ഷാ സ്വിമ്മിംഗ് അക്കാഡമിയുടെ ഗ്രാൻഡ് മാസ്റ്റർ അബ്ദുൽ കലാം ആസാദ് വിവരിച്ചു.
ഓപ്പൺ വാട്ടർ സ്വിമ്മിംഗ് പരിശീലനത്തിലൂടെ ഭിന്നശേഷിക്കാരായ പത്ത് കുട്ടികളെ വേമ്പനാട്ടുകായലിൽ
അഞ്ച് കിലോമീറ്റർ നീന്തിച്ച് വേൾഡ് റെക്കോർഡ് നേട്ടത്തിലേക്ക് നയിച്ചതും ഹൈഡ്രോ തെറാപ്പി പ്രവർത്തനങ്ങളിലെ ശ്രദ്ധേയമായ അധ്യായമാണ്.
ഈ നേട്ടത്തിന്റെ ഭാഗമായ അഞ്ച് നീന്തൽ താരങ്ങളെയും ചടങ്ങിൽ പ്രത്യേകം ആദരിച്ചു.
പരിമിതികളെ അതിജീവിച്ച് കുട്ടികൾ കൈവരിച്ച ഈ നേട്ടം ഇൻക്ലൂസീവ് സ്പോർട്സ് മേഖലയ്ക്ക് വലിയ പ്രചോദനമായി.
ഓട്ടിസം: വെല്ലുവിളികളും അതിജീവന മാർഗങ്ങളും ചർച്ചയായി
കോൺഫറൻസിന്റെ ഭാഗമായി കാരിത്താസ് ആശുപത്രിയിലെ ക്ലിനിക്കൽ സൈക്കോളജിസ്റ്റ് സിസ്റ്റർ അഞ്ജിതയുടെ നേതൃത്വത്തിൽ ഓട്ടിസം സ്പെക്ട്രം അവസ്ഥകളുള്ള കുട്ടികളും അവരുടെ മാതാപിതാക്കളും നേരിടുന്ന വെല്ലുവിളികൾ,
കുടുംബത്തിന്റെ പങ്ക്, സാമൂഹിക പിന്തുണ, ശാസ്ത്രീയ ഇടപെടലുകൾ, അതിജീവന മാർഗങ്ങൾ എന്നിവയെക്കുറിച്ച് പ്രത്യേക പാനൽ ചർച്ചയും സംഘടിപ്പിച്ചു.
ഡോ. സണ്ണി ജോസഫ്, ഫാ. റോയ് മാത്യു വടക്കേൽ, സജൻ എസ്. നായർ, അബ്ദുൽ കലാം ആസാദ് എം.എ. എന്നിവർ ചർച്ചയിൽ പങ്കെടുത്തു.
വിവിധ മേഖലകളിലെ വിദഗ്ധരുടെ അനുഭവങ്ങളും പ്രായോഗിക നിർദേശങ്ങളും പങ്കുവെച്ച ചർച്ച ഏറെ ശ്രദ്ധേയമായി.
ബിസിഎം കോളേജിലെ ചൈൽഡ് ഡെവലപ്മെന്റ്, സോഷ്യോളജി, സൈക്കോളജി വിഭാഗങ്ങളുടെ നേതൃത്വത്തിലാണ് പ്രോഗ്രാം സംഘടിപ്പിച്ചത്.
കോൺഫറൻസ് ഓട്ടിസം മേഖലയിലെ ഗവേഷണം, ചികിത്സ, പരിശീലനം, കുടുംബപിന്തുണ, സാമൂഹിക ഉൾച്ചേർക്കൽ എന്നിവയ്ക്ക് പുതിയ ദിശാബോധം നൽകുന്നതായി.
