തിരുവനന്തപുരം: മുൻ മുഖ്യമന്ത്രിയും ഇപ്പോഴത്തെ പ്രതിപക്ഷ നേതാവുമായ പിണറായി വിജയനെതിരെ വിവാദ പരാമർശവുമായി പൂഞ്ഞാർ എംഎല്‍എ എം.ജെ സെബാസ്റ്റ്യൻ.
മുൻ സർക്കാരിന്റെ ചെയ്തികളെ കുറിച്ച്‌ അറിഞ്ഞാല്‍ നിങ്ങള്‍ പിണറായി വിജയനെ എഴുന്നേറ്റ് നിന്ന് അടിക്കുമെന്നായിരുന്നു വിവാദ പരാമർശം.
ജല്‍ജീവൻ മിഷനുമായി ബന്ധപ്പെട്ട് വലിയ അഴിമതി നടന്നിട്ടുണ്ടെന്നും അദ്ദേഹം ആരോപിച്ചു. പാലായില്‍ കേരള സ്റ്റേറ്റ് സർവീസ് പെൻഷണേഴ്സ് അസോസിയേഷന്റെ പരിപാടിയില്‍ സാസാരിക്കുന്നതിനിടെയാണ് വിവാദ പരാമർശം.
44,000 കോടി വരുന്ന ജലനിധി എന്ന പദ്ധതിയില്‍ ഏകദേശം 420 പ്രൊജക്ടുകളാണ്. അതിലേറ്റവും വലിയ പ്രൊജക്ടാണ് പാലാ, പൂഞ്ഞാർ ഉള്‍പ്പെടുന്ന 13 പഞ്ചായത്തിലെ പ്രൊജക്‌ട്.
67 ടാങ്കുകള്‍, അതില്‍ രണ്ടെണ്ണം 45 ലക്ഷം ലിറ്ററിൻ്റേയും 35 ലക്ഷം ലിറ്ററിൻ്റേയുമാണ്. അതില്‍ ഒരെണ്ണം മുണ്ടക്കയത്തും ഒരെണ്ണം മേലൂരുമാണ്. പമ്പിങ് സ്റ്റേഷൻ പണി നടക്കുന്നത് എവിടെയാണെന്ന് പോലുമറിയില്ല, പൂഞ്ഞാർ എംഎല്‍എ വിശദീകരിച്ചു.
35 സപ്ലൈ ടാങ്കുകള്‍, അതില്‍ ഏഴെണ്ണത്തിൻ്റെ പണി തീർന്നിട്ടില്ല. ആ സമയത്ത് ഇവർ മൂഴുവൻ പൈപ്പുകളും വാങ്ങി. എന്നോട് ഇന്ന് ഒരു കോണ്‍ട്രാക്ടർ പറഞ്ഞു, അതിൻ്റെ ശരിയായ എസ്റ്റിമേറ്റെടുക്കണമെന്ന്.
600 മില്ലി ഡയാറുള്ള പൈപ്പുകളാണ് പമ്പിങ് സ്റ്റേഷനുകളില്‍ വച്ചിരിക്കുന്നത്. അങ്ങനെ പമ്പ് ചെയ്യാൻ പറ്റുന്ന മോട്ടോറോ പമ്പോ ഇന്ത്യയില്‍ എവിടെയുമില്ല- എം.ജെ. സെബാസ്റ്റ്യൻ പറയുന്നു.
