തിരുവനന്തപുരം: തലസ്ഥാനത്തെ മാനവീയം വീഥിയില്‍ സാംസ്കാരിക പരിപാടി കോ‍ർപ്പറേഷൻ വിലക്കിയെന്ന് ആക്ഷേപം.
മാനവീയം രജതജൂബിലി ആഘോഷ സമിതി നാളെ നടത്താനിരുന്ന ഗായിക പുഷ്പവതിയുടെ ഗാനമേളയ്ക്കാണ് അനുമതി നിഷേധിച്ചത്.
കാരണം പറയാതെ മേയർ അനുമതി അപേക്ഷ തളളിയെന്ന് സംഘാടകർ ആരോപിച്ചു.
എന്നാല്‍ രജത ജൂബിലി ആഘോഷ സമിതിയില്‍ കോർപ്പറേഷന്‍റെ പങ്കാളിത്തമില്ലെന്നും ഏതെങ്കിലും നാലു പേർ ചേർന്ന് സമിതിയുണ്ടാക്കിയാല്‍ പരിപാടിക്ക് അനുമതി നല്‍കില്ലെന്നും മേയർ വി വി രാജേഷ് പ്രതികരിച്ചു.
ഗ്യാനേഷ് കുമാറിനെതിരെ മാനവീയം വീഥിയില്‍ പ്രതിഷേധിച്ചവ‍ർക്കതിരെ കഴിഞ്ഞയാഴ്ച കേസെടുത്തിരുന്നു. പിന്നാലെയാണ് സംഗീത പരിപാടി വിലക്കിയതും.
രജത ജൂബിലി ആഘോഷിക്കാൻ ഒരു കമ്മിറ്റിയെയും ചുമതലപ്പെടുത്തിയിട്ടില്ല. കോർപറേഷൻ പ്രതിനിധികള്‍ ഉള്‍പ്പെട്ട സമിതി അല്ല. ഏതെങ്കിലും നാല് പേർ വന്ന് പരിപാടി നടത്തുമെന്ന് പറഞ്ഞാല്‍ ശരിയാവില്ല.
മാനവീയത്തില്‍ സാംസ്കാരിക പരിപാടികള്‍ കൂടുതല്‍ നടത്തും. പക്ഷെ കൃത്യമായ മാനദണ്ഡങ്ങള്‍ പാലിക്കണം. നല്ല ഉദ്ദേശത്തോടെ വേണം പരിപാടികള്‍. അനുമതി ഇല്ലാതെ സംഘടിപ്പിച്ചാല്‍ ബാക്കി പൊലീസ് നോക്കിക്കോളുമെന്നും വി വി രാജേഷ് പറഞ്ഞു.
