കൊച്ചി: നഗരത്തില് ലഹരിമരുന്ന് സംഘങ്ങള്ക്കെതിരെ പോലീസിന്റെ 'ഓപ്പറേഷൻ തൂഫാൻ നാർക്കോ ഹണ്ട്' നടപടി ശക്തമാകുന്നു.
കളമശ്ശേരി സ്റ്റേഷൻ പരിധിയില് രണ്ടിടങ്ങളിലായി നടത്തിയ പരിശോധനയില് 88.97 ഗ്രാം എം.ഡി.എം.എയും കഞ്ചാവുമായി രണ്ടുപേരെ പോലീസ് പിടികൂടി. പത്തടിപ്പാലം ഭാഗത്തുനിന്നാണ് പത്തനംതിട്ട പേട്ട സ്വദേശി ഷാരൂഖ് ഷജീബിനെ (22) കസ്റ്റഡിയിലെടുത്തത്. ഇയാളില്നിന്ന് 53.84 ഗ്രാം എം.ഡി.എം.എയും 5.83 ഗ്രാം കഞ്ചാവും കണ്ടെടുത്തു.
കളമശ്ശേരി, ഇൻഫോപാർക്ക് പോലീസ് സ്റ്റേഷനുകളില് മുൻപും മയക്കുമരുന്ന് കേസുകളില് ഉള്പ്പെട്ടയാളാണ് ഷാരൂഖ്. ഇയാള്ക്കെതിരെ കൂടുതല് കർശനമായ നിയമനടപടികള് ആരംഭിച്ചതായി പോലീസ് അറിയിച്ചു. മറ്റൊരു പരിശോധനയില് കണ്ണൂർ കണിച്ചാർ സ്വദേശിയായ ജിത്തുമോൻ (25) എന്നയാളെ 35.130 ഗ്രാം എം.ഡി.എം.എയുമായി ഇടപ്പള്ളി ടോള് ജങ്ഷനില് നിന്നാണ് പിടികൂടിയത്. കൊച്ചി സിറ്റി പോലീസ് കമ്മീഷണർ കാളിരാജ് മഹേഷ് കുമാറിന് ലഭിച്ച രഹസ്യവിവരത്തിന്റെ അടിസ്ഥാനത്തിലായിരുന്നു തിരച്ചില്. ഡി.സി.പി മോഹിത് റാവത്തിന്റെ മേല്നോട്ടത്തില് നാർക്കോട്ടിക് സെല് അസിസ്റ്റന്റ് കമ്മീഷണർ ടി.ഡി. സുനില്കുമാറിന്റെ നേതൃത്വത്തിലുള്ള കൊച്ചി സിറ്റി ഡാൻസാഫ് സംഘവും കളമശ്ശേരി പോലീസും ചേർന്നാണ് പ്രതികളെ വലയിലാക്കിയത്.
