തിരുവനന്തപുരം: സംസ്ഥാന സ്പോർട്സ് കൗണ്സിലിന്റെ ആസ്ഥാനത്തും 13 ജില്ലാ ഓഫീസുകളിലും വിജിലൻസ് നടത്തിയ 'ഓപ്പറേഷൻ കളിക്കളം' മിന്നല് പരിശോധനയില് വൻ അഴിമതിയും ചട്ടലംഘനങ്ങളും കണ്ടെത്തി.
കായികമേഖലയ്ക്കായി നീക്കിവെച്ച ഫണ്ട് വകമാറ്റിയതിലും നിയമനങ്ങളിലും യോഗ്യതാ മാനദണ്ഡങ്ങളിലും വ്യാപക തട്ടിപ്പുകൾ നടന്നതായി വിജിലൻസിന്റെ പ്രാഥമിക നിഗമനം. 2019-2021 കാലയളവില് മുൻ സ്റ്റേറ്റ് കൗണ്സില് പ്രസിഡന്റിന് യാതൊരുവിധ ഔദ്യോഗിക അനുമതികളുമില്ലാതെ ലക്ഷങ്ങള് അലവൻസായി നല്കിയതായി പരിശോധനയില് തെളിഞ്ഞു.
മാനദണ്ഡങ്ങള് പാലിക്കാതെയും സർക്കാരിന്റെ മുൻകൂർ അനുമതിയില്ലാതെയും കണ്സള്ട്ടന്റുമാരെ നിയമിച്ചതായും കണ്ടെത്തലുണ്ട്. കായിക താരങ്ങള്ക്കായി ഫണ്ട് വിനിയോഗിച്ച് വാങ്ങിയ ലക്ഷക്കണക്കിന് രൂപയുടെ ഉപകരണങ്ങള് വിതരണം ചെയ്യാതെ വിവിധ കേന്ദ്രങ്ങളില് കെട്ടിക്കിടക്കുകയാണ്. തട്ടിപ്പുകള് പുറത്തുവരാതിരിക്കാൻ ക്യാഷ് ബുക്ക്, പർച്ചേസ് രജിസ്റ്റർ, പ്രോപ്പർട്ടി രജിസ്റ്റർ, ഡിസ്പോസല് രജിസ്റ്റർ തുടങ്ങിയ പ്രധാനപ്പെട്ട ഔദ്യോഗിക രേഖകളൊന്നും ഓഫീസുകളില് കൃത്യമായി സൂക്ഷിച്ചിട്ടില്ല.
ജില്ലാ ചാമ്പ്യൻഷിപ്പുകളില് യോഗ്യത നേടാത്ത പല താരങ്ങളെയും ബന്ധപ്പെട്ടവരുടെ സ്വാധീനത്തില് ചട്ടങ്ങള് ലംഘിച്ച് സംസ്ഥാന ചാമ്പ്യൻഷിപ്പുകളില് പങ്കെടുപ്പിച്ചു. അർഹരായ പല കായികതാരങ്ങള്ക്കും അവസരം നിഷേധിച്ചാണ് ഇത്തരം ക്രമക്കേടുകള് നടത്തിയത്. സ്പോർട്സ് കൗണ്സിലിന്റെ കീഴിലുള്ള ഇൻഡോർ സ്റ്റേഡിയങ്ങള് ചിലർക്ക് തുച്ഛമായ നിരക്കിലും മറ്റുള്ളവർക്ക് ഉയർന്ന നിരക്കിലും നല്കിയതിലൂടെ ഉദ്യോഗസ്ഥർ ഭീമമായ തുക വകമാറ്റിയെന്നും അന്വേഷണത്തില് കണ്ടെത്തിയിട്ടുണ്ട്. വിവിധ നിർമ്മാണ കരാറുകാരില് നിന്ന് ഉദ്യോഗസ്ഥർ അനധികൃതമായി പണം കൈപ്പറ്റിയതിന്റെ വിവരങ്ങളും വിജിലൻസിന് ലഭിച്ചു.
