കോട്ടയം: ഓണാഘോഷം തുടങ്ങിയതോടെ പൂക്കള്ക്ക് തീവിലയാണ് വിപണിയില്. ബന്തിയുടെ വില കിലോയ്ക്ക് 180 രൂപ മുതല് 200 വരെയാണ്.
ജമന്തി 500 രൂപ മുതല് 600 വരെയായി. മുൻ വർഷങ്ങളേക്കാള് ഇരട്ടിയായി പൂക്കളുടെ വില.
ഇത്തവണത്തെ മഴക്കെടുതിയും പൂക്കളുടെ വില കൂടാൻ കാരണമായിട്ടുണ്ടെന്നാണ് മൊത്തക്കച്ചവടക്കാർ പറയുന്നത്. മൈസൂർ, തെങ്കാശി, ബംഗളൂരു, ഹോസൂർ, ശങ്കരൻ കോവില് എന്നിവിടങ്ങളില് നിന്നാണ് ജില്ലയിലേക്ക് പ്രധാനമായും പൂക്കള് എത്തുന്നത്. ജില്ലയില് നിരവധി പേർ ഓണം വിപണി ലക്ഷ്യമിട്ട് പൂക്കൃഷി ചെയ്തിരുന്നു. എന്നാല് മിന്നല് പ്രളയത്തില് കൃഷി നശിച്ചു. ഗതാഗത ചെലവും കയറ്റുമതി, ഇറക്കുമതി ചെലവ് കൂടിയതും വില വർദ്ധനവിന് കാരണമായി. സീസണ് മുതലാക്കാൻ വൻകിട കച്ചവടക്കാർ നടത്തുന്ന കൃത്രിമ ക്ഷാമവും വില വർദ്ധനവിന് കാരണമായിട്ടുണ്ട്.
പൂക്കളുടെ വില (കിലോ ഗ്രാമില്)
ബന്തി (ചെണ്ടുമല്ലി) : 180 - 200 രൂപ
ജമന്തി : 500 - 600 രൂപ
വാടാമല്ലി : 200 - 250 രൂപ
അരളി : 550 രൂപ
റെഡ് റോസ് : 400 - 450 രൂപ
ട്യൂബ് റോസ് : 650 രൂപ
കുടുംബശ്രീയില് വില 150
വിപണിയില് കൂടിയ വില ഈടാക്കുമ്പോള് കുടുംബശ്രീ കിലോയ്ക്ക് 150 രൂപയ്ക്കാണ് ബന്ദിപ്പൂക്കള് വില്ക്കുന്നത്. നിരവധിയാളുകള് പൂക്കള്ക്കായി കുടുംബശ്രീയെ സമീപിക്കുന്നുണ്ട്. ഓറഞ്ച്, മഞ്ഞ ബന്ദികളാണ് കുടുംബശ്രീക്കാർ കൃഷി ചെയ്തിരിക്കുന്നത്.
