ഓണത്തോടനുബന്ധിച്ചുള്ള യാത്രാ തിരക്ക് കണക്കിലെടുത്ത് കേരളത്തിലേക്ക് 112 സ്പെഷ്യൽ ട്രെയിനുകൾ സർവീസ് നടത്തുമെന്ന് റെയിൽവേ അറിയിച്ചു. ഓഗസ്റ്റ് 14 മുതൽ സെപ്റ്റംബർ 6 വരെയാണ് പ്രത്യേക സർവീസുകൾ ക്രമീകരിച്ചിരിക്കുന്നത്.
തമിഴ്നാട്, കർണാടക, തെലങ്കാന, ആന്ധ്രാപ്രദേശ്, പശ്ചിമ ബംഗാൾ എന്നീ സംസ്ഥാനങ്ങളിൽ നിന്നുള്ള യാത്രക്കാർക്ക് സൗകര്യമൊരുക്കുന്ന തരത്തിലാണ് സർവീസുകൾ. ചെന്നൈ, ബെംഗളൂരു, മൈസൂരു, ഹുബ്ബള്ളി, ഹൈദരാബാദ്, സാന്ദ്രഗാച്ചി എന്നിവിടങ്ങളിൽ നിന്ന് തിരുവനന്തപുരം, കൊല്ലം, കോട്ടയം, എറണാകുളം, കണ്ണൂർ, മംഗളൂരു എന്നിവിടങ്ങളിലേക്കാണ് ട്രെയിനുകൾ ഓടുക.
ദക്ഷിണ റെയിൽവേ, ദക്ഷിണ പശ്ചിമ റെയിൽവേ, ദക്ഷിണ മധ്യ റെയിൽവേ, ദക്ഷിണ കിഴക്കൻ റെയിൽവേ എന്നീ സോണുകളുടെ സഹകരണത്തോടെയാണ് സർവീസുകൾ ഒരുക്കിയിരിക്കുന്നത്.
കഴിഞ്ഞ വർഷത്തേക്കാൾ ഇത്തവണ ഓണത്തോടനുബന്ധിച്ച് അനുവദിച്ച പ്രത്യേക ട്രെയിനുകളുടെ എണ്ണം ഗണ്യമായി വർധിപ്പിച്ചിട്ടുണ്ട്. 2025-ൽ 55 സ്പെഷ്യൽ ട്രെയിനുകൾ മാത്രമായിരുന്നപ്പോൾ, ഇത്തവണ അത് 112 ആയി ഉയർത്തിയിട്ടുണ്ട്.
